ശാസ്ത്രം, ബഹിരാകാശ ഗവേഷണം എന്നിവയിലെല്ലാം താൽപര്യമുള്ള കുട്ടികൾക്കായി ഐ.എസ്.ആർ.ഒ ഈ അവധിക്കാലത്ത് ആകാശത്തിന്റെ അറിവുകളെ തൊട്ടറിയുന്നതിനായി ഒരു മികച്ച അവസരം ഒരുക്കുന്നു!
ഐ.എസ്.ആർ.ഒ ഒരുക്കുന്ന ‘യുവിക’ എന്ന വേനൽ കാല യുവ ശാസ്‌ത്രജ്ഞ ക്യാമ്പിലേക്ക് എട്ടാം ക്ലാസ് പൂർത്തിയാക്കിയ നിലവിൽ ഒമ്പതാം ക്ലാസിൽ പഠിക്കുന്ന കുട്ടികൾക്കാണ് പങ്കെടുക്കാനാവുക. ബഹിരാകാശ ശാസ്ത്രത്തിന്റെ അടിസ്ഥാന വിവരങ്ങൾ, ബഹിരാകാശ രംഗത്തെ നൂതന സാങ്കേതിക വിദ്യകളുടെ സംക്ഷിപ്ത രൂപങ്ങൾ, ഉപഗ്രഹ പരിജ്ഞാനം എന്നിങ്ങനെ പല മേഖലകളിലും കുട്ടികൾക്ക് അറിവ് പകർന്നു കൊടുക്കാൻ ഉദ്ദേശിച്ചുള്ളതാണ് ഈ പദ്ധതി. ബഹിരാകാശ ഗവേഷണ രംഗത്ത് ഭാവിയില്‍ പരിശീലനം നേടാനും പഠിക്കാ നും താല്‍പ്പര്യമുള്ള വിദ്യാര്‍ത്ഥികളെ സൃഷ്ടിക്കലാണ് ‘യുവിക’ -യുടെ ലക്ഷ്യം.
മെയ് 11 മുതൽ 22 വരെ നടക്കുന്ന ഈ പരിശീലന പരിപാടിയിലേക്ക് ഫെബ്രുവരി 24 വരെ ഓൺലൈൻ വഴി അപേക്ഷിക്കാം. പ്രവാസി ഭാരതീയരായ വിദ്യാര്‍ത്ഥികള്‍ക്കും ഈ പരിപാടിയിലേക്ക് അപേക്ഷിക്കാവുന്നതാണു. ഓരോ സംസ്ഥാനത്തു നിന്നും കേന്ദ്ര ഭരണപ്രദേശത്തു നിന്നും സി ബി എസ് സി, ഐ സി എസ് ഇ, സംസ്ഥാന സിലബസ്സുകളിൽ ഉൾപ്പെട്ട മൂന്ന് വിദ്യാര്‍ത്ഥികളെ വീതമാണ് തിരഞ്ഞെടുക്കുക. 8-ാം ക്ലാസ്സിലെ വിദ്യാഭ്യാസ മികവും പാഠ്യേതര രംഗത്തെ മികവുകളും അടിസ്ഥാനമാക്കിയായിരിക്കും വിദ്യാര്‍ത്ഥികളെ തിരഞ്ഞെടുക്കുക. 8-ാം ക്ലാസ്സിൽ മികച്ച മാർക്കു നേടിയവർ, ജില്ലാ/സംസ്ഥാന കലാകായിക മത്സരങ്ങളിൽ സമ്മാനം ലഭിച്ചവർ, എൻ.സി.സി,സ്കൗട്ട് എന്നിവയിൽ അംഗമായവർ, പഞ്ചായത്ത്, ഗ്രാമീണ മേഖലകളിലെ സ്കൂളുകളിൽ പഠിക്കുന്നവർ തുടങ്ങിയവർക്ക് മുൻതൂക്കം ലഭിക്കും.
ഐ.എസ്.ആർ.ഒയുടെ അഹ്മദാബാദ്, ബാംഗ്ലൂർ, ഷില്ലോങ്, തിരുവനന്തപുരം എന്നീ സെൻററുകളിൽ വെച്ചായിരിക്കും പരിശീലനം. തിരഞ്ഞെടുക്കപ്പെടുന്ന കുട്ടികളുടെ യാത്ര, പഠന പുസ്തകങ്ങൾ, ഭക്ഷണം, താമസം തുടങ്ങിയ ചെലവുകളെല്ലാം ഐ.എസ്.ആർ.ഒ വഹിക്കും.
കൂടുതൽ വിവരങ്ങൾക്കും ഓൺലൈൻ ആയി രെജിസ്റ്റർ ചെയ്യുന്നതിനും: https://www.isro.gov.in/update/22-jan-2020/young-scientist-programme-2020
തയ്യാറാക്കിയത്: Jaleel Chakkolayil
