മുപ്പത്തൊന്നാമത് അബുദാബി ഇന്റർനാഷണൽ ബുക്ക് ഫെയർ ഇന്ന് (2022 മെയ് 23) മുതൽ ആരംഭിക്കും. 2022 മെയ് 23 മുതൽ മെയ് 29 വരെ അബുദാബി നാഷണൽ എക്സിബിഷൻ സെന്ററിൽ (ADNEC) വെച്ചാണ് ഈ പുസ്തകമേള സംഘടിപ്പിക്കുന്നത്.
80 രാജ്യങ്ങളിൽ നിന്നായി ഏതാണ്ട് 1130 പ്രസാധകർ അബുദാബി ഇന്റർനാഷണൽ ബുക്ക് ഫെയർ 2022-ൽ പങ്കെടുക്കുന്നതാണ്. ഈ മേളയുടെ ഭാഗമായി 450-ൽ പരം പ്രത്യേക പരിപാടികൾ അരങ്ങേറുമെന്നും സംഘാടകർ വ്യക്തമാക്കിയിട്ടുണ്ട്.
അബുദാബി ഡിപ്പാർട്മെന്റ് ഓഫ് കൾച്ചർ ആൻഡ് ടൂറിസം, അബുദാബി അറബിക് ലാംഗ്വേജ് സെന്റർ എന്നിവർ സംയുക്തമായാണ് ഈ പുസ്തകമേള സംഘടിപ്പിക്കുന്നത്. ഏഴ് ദിവസം നീണ്ട് നിൽക്കുന്ന ഈ പുസ്തകമേളയിൽ ആഗോളതലത്തിൽ ശ്രദ്ധേയരായ സാഹിത്യകാരന്മാർ, നോബൽ സമ്മാനജേതാക്കൾ, പണ്ഡിതർ മുതലായവർ പങ്കെടുക്കുന്നതാണ്.
മേളയുടെ ഭാഗമായി പ്രത്യേക സംവാദങ്ങൾ, വർക്ക്ഷോപ്പുകൾ, കാവ്യസന്ധ്യകൾ, മറ്റു സാംസ്‌കാരിക പരിപാടികൾ മുതലായവ സംഘടിപ്പിക്കുന്നതാണ്. മുപ്പത്തൊന്നാമത് അബുദാബി ഇന്റർനാഷണൽ ബുക്ക് ഫെയറിലെ മുഖ്യാതിഥിയായി ജർമനിയെയാണ് തിരഞ്ഞെടുത്തിരിക്കുന്നത്.
WAM [Cover Image: Abu Dhabi International Book Fair File Photo. Source: WAM]
