ഷെയ്ഖ് സായിദ് റോഡിൽ വെച്ച് നടത്തുന്ന ദുബായ് റണിൽ പങ്കെടുക്കാൻ ആഗ്രഹിക്കുന്നവർക്കുള്ള രജിസ്‌ട്രേഷൻ തുടരുന്നതായി ദുബായ് മീഡിയ ഓഫീസ് അറിയിച്ചു. 2022 നവംബർ 16-നാണ് മീഡിയ ഓഫീസ് ഇക്കാര്യം അറിയിച്ചത്.
നാലാമത് ദുബായ് റൺ 2022 നവംബർ 20-ന് സംഘടിപ്പിക്കുമെന്ന് അധികൃതർ നേരത്തെ അറിയിച്ചിരുന്നു. ഇതിനായുള്ള തയ്യാറെടുപ്പുകൾ പൂർത്തിയായി വരുന്നതായി അധികൃതർ വ്യക്തമാക്കി.
ദുബായ് റണിൽ പങ്കെടുക്കാൻ ആഗ്രഹിക്കുന്ന പൗരന്മാർക്കും, പ്രവാസികൾക്കും, സന്ദർശകർക്കും https://www.dubairun.com/register/ എന്ന വിലാസത്തിൽ രജിസ്റ്റർ ചെയ്യാവുന്നതാണ്. ദുബായ് ഫിറ്റ്‌നസ് ചലഞ്ചിന്റെ ഭാഗമായാണ് ദുബായ് റൺ സംഘടിപ്പിക്കുന്നത്.
പങ്കെടുക്കുന്നവരുടെ ബാഹുല്യം കൊണ്ട് ലോകത്തെ തന്നെ ഏറ്റവും വലിയ ഇത്തരത്തിലുള്ള പരിപാടിയാണ് ദുബായ് റൺ. ദുബായ് റൺ 2022-ന്റെ ഭാഗമായി നഗരത്തിലെ സൂപ്പർഹൈവേയായ ഷെയ്ഖ് സായിദ് റോഡ് ഒരു ഭീമൻ റണ്ണിംഗ് ട്രാക്കായി രൂപാന്തരപ്പെടുന്നതാണ്.
എല്ലാ പ്രായത്തിലും വിഭാഗങ്ങളിലുമുള്ളവർക്കും പങ്കെടുക്കാനാകുന്ന രീതിയിൽ 5 കിലോമീറ്ററും 10 കിലോമീറ്ററും ദൈർഘ്യമുള്ള രണ്ട് റൂട്ടുകളാണ് ദുബായ് റൺ 2022-ൽ ഒരുക്കുന്നത്. കുടുംബങ്ങൾ, കാൽനടത്തക്കാർ തുടങ്ങിയവർക്കായി 5 കിലോമീറ്റർ നീളുന്ന ഒരു റൂട്ട്, കൂടുതൽ തഴക്കമുള്ള ഓട്ടക്കാർക്കായി 10 കിലോമീറ്റർ നീളമുള്ള മറ്റൊരു റൂട്ട് എന്നിവയാണ് ദുബായ് റണ്ണിൽ ഉൾപ്പെടുത്തുന്നത്.
രജിസ്‌ട്രേഷൻ പൂർത്തിയാക്കിയവർക്ക് തങ്ങളുടെ ഔദ്യോഗിക നമ്പർ അടങ്ങിയ സ്റ്റിക്കർ ഇബ്ൻ ബത്തൂത്ത മാൾ, ദുബായ് ഹിൽസ് മാൾ, ദൈറ സിറ്റി സെന്റർ എന്നിവിടങ്ങളിൽ നിന്ന് ലഭിക്കുന്നതാണ്. നവംബർ 17, 18, 19 തീയതികളിൽ ഈ മാളുകൾ പ്രവർത്തിക്കുന്ന സമയങ്ങളിൽ ഔദ്യോഗിക നമ്പർ നേടാവുന്നതാണ്.
ദുബായ് റണിന് എത്തുന്നവർ രജിസ്‌ട്രേഷൻ സമയത്ത് നൽകിയിട്ടുള്ള സമയക്രമം പാലിച്ച് കൊണ്ട് നവംബർ 20-ന് എത്തിച്ചേരാൻ ശ്രമിക്കേണ്ടതാണ്. രാവിലെ 6:30-നാണ് ദുബായ് റൺ ആരംഭിക്കുന്നത്. എന്നാൽ ഈ പരിപാടിയിൽ പങ്കെടുക്കുന്നവർക്ക് പുലർച്ചെ നാല് മണിമുതൽ എത്തിച്ചേരാനുള്ള സമയം നൽകിയിട്ടുണ്ട്. നവംബർ 20-ന് ദുബായ് മെട്രോ പുലർച്ചെ 3:30 മുതൽ പ്രവർത്തിക്കുന്നതാണ്.
