റഷ്യൻ നിർമ്മിത COVID-19 വാക്സിനിന്റെ മൂന്നാം ഘട്ട ക്ലിനിക്കൽ പരീക്ഷണങ്ങൾ എമിറേറ്റിൽ ആരംഭിക്കാൻ തീരുമാനിച്ചതായി അബുദാബി ഡിപ്പാർട്ട്മെന്റ് ഓഫ് ഹെൽത്ത് അറിയിച്ചു. മനുഷ്യരിൽ സാധാരണയായി കണ്ണുകളെയും, ശ്വാസകോശങ്ങളെയും ബാധിക്കുന്ന അഡിനോവൈറസുകളെ അടിസ്ഥാനമാക്കി നിർമ്മിക്കുന്ന ഈ വാക്സിനിന്റെ പരീക്ഷണം ‘വാക്സിൻ ഫോർ വിക്ടറി’ എന്ന പ്രചാരണ പരിപാടിയോടെയാണ് എമിറേറ്റിൽ നടപ്പിലാക്കുന്നത്.
ഇതിൽ പങ്കെടുക്കാൻ താത്പര്യമുള്ള സന്നദ്ധസേവകർക്ക് https://v4v.ae/ എന്ന വിലാസത്തിൽ റെജിസ്റ്റർ ചെയ്യാവുന്നതാണ്. ആദ്യ ഘട്ടത്തിൽ അബുദാബിയിൽ നിന്ന് 500 സന്നദ്ധസേവകർക്കാണ് ഈ വാക്സിൻ നൽകുന്നത്. യു എ ഇ പൗരന്മാർക്കും, പ്രവാസികൾക്കും ഈ പരീക്ഷണത്തിൽ പങ്കാളികളാകാവുന്നതാണ്.
അബുദാബിയിൽ നടക്കുന്ന റഷ്യൻ നിർമ്മിത COVID-19 വാക്സിനിന്റെ മൂന്നാം ഘട്ട ക്ലിനിക്കൽ പരീക്ഷണത്തിൽ താഴെ പറയുന്ന നിബന്ധനകൾ പ്രകാരം പങ്കെടുക്കാവുന്നതാണ്:
- അബുദാബിയിൽ താമസിക്കുന്നവരായിരിക്കണം.
- ചുരുങ്ങിയത് 18 വയസ്സായവരായിരിക്കണം.
- മുൻപ് COVID-19 രോഗബാധ സ്ഥിരീകരിച്ചവരാകരുത്.
- കഴിഞ്ഞ 14 ദിവസങ്ങൾക്കിടയിൽ ശ്വാസകോശ സംബന്ധിയായ അസുഖങ്ങളോ, പകർച്ചവ്യാധികളോ വന്നവരാകരുത്.
- മറ്റു വാക്സിൻ പരീക്ഷണങ്ങളിൽ പങ്കാളികളായ സന്നദ്ധസേവകർ പങ്കെടുക്കരുത്.
ഈ നിബന്ധനകൾ പ്രകാരമുള്ള സന്നദ്ധസേവകർക്ക് 20 ദിവസത്തെ ഇടവേളയിൽ 2 ഡോസ് വാക്സിനാണ് നൽകുന്നത്. ഇതിനു ശേഷം ഇവരെ തുടർച്ചയായി നിരീക്ഷണ, പരിശോധനകൾക്ക് വിധേയരാക്കുന്നതാണ്.
റഷ്യൻ ഡയറക്റ്റ് ഇൻവെസ്റ്റ്മെന്റ് ഫണ്ട്, അബുദാബി ആസ്ഥാനമായി പ്രവർത്തിക്കുന്ന ‘Aurugulf Health Investment’ എന്നിവർ സംയുക്തമായാണ് ഈ വാക്സിൻ പരീക്ഷണം എമിറേറ്റിൽ നടപ്പിലാക്കുന്നത്.
Cover Photo: WAM
