റമദാനിൽ ഷോപ്പിംഗ് ആവശ്യങ്ങൾക്കായി വിവിധ വ്യാപാരസ്ഥാപനങ്ങൾ സന്ദർശിക്കുന്നവർ പാലിക്കേണ്ടതായ ഏതാനം സുരക്ഷാ നിർദ്ദേശങ്ങൾ സംബന്ധിച്ച് അബുദാബി മീഡിയ ഓഫീസ് അറിയിപ്പ് നൽകി. പൊതുസമൂഹത്തിന്റെയും, കുടുംബാംഗങ്ങളുടെയും സുരക്ഷ ഉറപ്പ് വരുത്തിക്കൊണ്ട് ഷോപ്പിംഗ് നടത്തുന്നതിനുള്ള നിർദ്ദേശങ്ങളാണ് ഈ അറിയിപ്പിൽ ഉൾപ്പെടുത്തിയിരിക്കുന്നത്.
ഷോപ്പിംഗ് സുരക്ഷിതമാക്കാനുള്ള നിർദ്ദേശങ്ങൾ:
- വ്യാപാരശാലകൾ, വാണിജ്യ കേന്ദ്രങ്ങൾ തുടങ്ങിയ ഇടങ്ങളിലേക്കുള്ള പരമാവധി യാത്രകൾ ഒഴിവാക്കാൻ ശ്രമിക്കേണ്ടതാണ്. തീർത്തും ഒഴിവാക്കാനാകാത്ത സാഹചര്യങ്ങളിൽ വ്യാപാരശാലകളിലേക്കുള്ള സന്ദർശനങ്ങൾക്കായി തിരക്കൊഴിഞ്ഞ സമയങ്ങൾ തിരഞ്ഞെടുക്കേണ്ടതാണ്.
- പലവ്യഞ്ജനങ്ങൾ, പഴം, പച്ചക്കറി, മത്സ്യം, മാംസം എന്നിവ വാങ്ങുന്നതിനായി പരമാവധി ഓൺലൈൻ സംവിധാനങ്ങൾ പ്രയോജനപ്പെടുത്തേണ്ടതാണ്.
- വ്യാപാരശാലകൾ സന്ദർശിക്കുന്ന സാഹചര്യങ്ങളിൽ പണമിടപാടിനായി കഴിയുന്നതും ഡിജിറ്റൽ സംവിധാനങ്ങൾ ഉപയോഗിക്കേണ്ടതാണ്.
- വ്യാപാരശാലകളിലെ ട്രോളികൾ ഉപയോഗിക്കുന്നതിന് മുൻപ് അവയുടെ ഹാൻഡിൽ അണുവിമുക്തമാക്കേണ്ടതാണ്. വ്യാപാരശാലകളിലെ പ്രതലങ്ങളിലും മറ്റും സ്പർശിക്കുന്നത് ഒഴിവാക്കേണ്ടതാണ്.
- വാണിജ്യകേന്ദ്രങ്ങളിലും മറ്റും ലിഫ്റ്റുകളുടെ ഉപയോഗം ഒഴിവാക്കേണ്ടതാണ്. പകരം എസ്‌കലേറ്റർ, പടികൾ എന്നിവ ഉപയോഗിക്കേണ്ടതാണ്.
- ഷോപ്പിങ്ങിന് നടത്തി വീടുകളിലെത്തിയ ശേഷം സാധനങ്ങൾ ഡിസ്ഇൻഫെക്‌റ്റെന്റ് അടങ്ങിയ ടിഷ്യു ഉപയോഗിച്ച് ശുചിയാക്കേണ്ടതാണ്. പഴം, പച്ചക്കറി മുതലായവ കഴുകി വൃത്തിയാക്കാൻ ശ്രദ്ധിക്കേണ്ടതാണ്.
