പശ്ചിമേഷ്യന്‍ പ്രദേശങ്ങളിലും, നോർത്ത് ആഫ്രിക്കൻ പ്രദേശങ്ങളിലും വെച്ച് നടക്കുന്ന ഏറ്റവും വലിയ ആരോഗ്യപരിചരണ, ലബോറട്ടറി മേഖലയിലെ പ്രദർശനമായ അറബ് ഹെൽത്ത് ആൻഡ് മെഡ്‌ലാബ് മിഡിൽ ഈസ്റ്റ് 2022 ജനുവരി 24-ന് ആരംഭിക്കും. ദുബായ് വേൾഡ് ട്രേഡ് സെന്ററിലാണ് ഈ എക്സിബിഷൻ സംഘടിപ്പിക്കുന്നത്.
നൂറ്റിയറുപതോളം രാജ്യങ്ങളിൽ നിന്നുള്ള ആരോഗ്യപരിചരണ മേഖലയിലെ ജീവനക്കാർ പങ്കെടുക്കുന്ന ഈ പ്രദർശനം 2022 ജനുവരി 24 മുതൽ ജനുവരി 27 വരെ നീണ്ട് നിൽക്കും. ആഗോളതലത്തിലുള്ള ആരോഗ്യപരിചരണ വ്യവസായ മേഖലയിലെ വ്യക്തികൾക്കും, സ്ഥാപനങ്ങൾക്കും ഏറ്റവും നൂതനമായ ആശയങ്ങൾ അവതരിപ്പിക്കുന്നതിനും, മെഡിക്കൽ രംഗത്തെ പുതിയ കണ്ടെത്തലുകൾ പരസ്പരം കൈമാറുന്നതിനുമുള്ള ഒരു വേദിയാണ് അറബ് ഹെൽത്ത് ആൻഡ് മെഡ്‌ലാബ് മിഡിൽ ഈസ്റ്റ് 2022.
നാല് ദിവസങ്ങളിലായി സംഘടിപ്പിക്കുന്ന ഈ പ്രദർശനത്തിൽ ഏതാണ്ട് അറുപതിനായിരത്തിൽ പരം ആളുകൾ പങ്കെടുക്കുമെന്നാണ് പ്രതീക്ഷിക്കുന്നത്. ആരോഗ്യപരിചരണ, ലബോറട്ടറി മേഖലകളിലെ നാലായിരത്തോളം പ്രദര്‍ശകർ ഈ മേളയിൽ പങ്കെടുക്കുമെന്ന് ഉറപ്പ് നൽകിയിട്ടുണ്ട്.
WAM
