ദെയ്‌റ ഐലൻഡിലെ സൂക്ക് അൽ മർഫായിലേക്കുള്ള പ്രവേശനം സുഗമമാക്കുന്നതിനായി പുതിയ അബ്ര, ഫെറി സ്റ്റേഷൻ പ്രവർത്തനമാരംഭിച്ചതായി ദുബായ് റോഡ്സ് ആൻഡ് ട്രാൻസ്‌പോർട്ട് അതോറിറ്റി (RTA) അറിയിച്ചു. 2022 മാർച്ച് 1-നാണ് ദുബായ് മീഡിയ ഓഫീസ് ഇത് സംബന്ധിച്ച അറിയിപ്പ് നൽകിയത്.
ആദ്യ അഞ്ച് മാസത്തേക്ക് ഈ സ്റ്റേഷനിൽ നിന്ന് സന്ദർശകർക്ക് സൗജന്യ യാത്ര അനുവദിക്കുമെന്നും അധികൃതർ വ്യക്തമാക്കിയിട്ടുണ്ട്. സൂക്ക് അൽ മർഫായിൽ നിന്ന് ദുബായ് ഓൾഡ് സൂക്ക്, ദെയ്‌റ ഓൾഡ് സൂക്ക് എന്നിവിടങ്ങളിലേക്ക് രണ്ട് റൂട്ടുകളിലായാണ് ഈ സ്റ്റേഷനിൽ നിന്ന് അബ്ര സേവനങ്ങൾ നൽകുന്നത്. ഈ അബ്ര യാത്രയ്ക്ക് 25 മിനിറ്റ് എടുക്കുന്നതാണ്.
അബ്ര പ്രവർത്തന സമയക്രമം:
- തിങ്കൾ മുതൽ വ്യാഴം വരെ – വൈകീട്ട് 5 മുതൽ രാത്രി 10 വരെ.
- വെള്ളി, ശനി, ഞായർ – രാവിലെ 10 മുതൽ രാത്രി 10 വരെ.
സൂക്ക് അൽ മർഫായിൽ നിന്ന് അൽ ഗുബൈബയിലേക്കാണ് ഫെറി സേവനങ്ങൾ നൽകുന്നത്. 20 മിനിറ്റ് ദൈർഘ്യമുള്ള ഫെറി യാത്ര വെള്ളി, ശനി, ഞായർ ദിനങ്ങളിൽ (വൈകീട്ട് 6 മുതൽ രാത്രി 10 വരെ) മാത്രമാണ്.
