എമിറേറ്റ്സ് ലൂണാർ മിഷന്റെ ഭാഗമായി റാഷിദ് റോവറിനെയും വഹിച്ച് കൊണ്ട് സഞ്ചരിക്കുന്ന ലാൻഡറിന്റെ ചന്ദ്രോപരിതലത്തിലിറങ്ങുന്നതിനുള്ള ആദ്യ ഉദ്യമം ഇന്ന് (2023 ഏപ്രിൽ 25, ചൊവ്വാഴ്ച) നടക്കുമെന്ന് മുഹമ്മദ് ബിൻ റാഷിദ് സ്പേസ് സെന്റർ (MBRSC) അറിയിച്ചു. 2023 ഏപ്രിൽ 24-ന് MBRSC ഡയറക്ടർ ജനറൽ സലേം അൽ മാരി ഇക്കാര്യം ട്വിറ്ററിലൂടെ വ്യക്തമാക്കിയിട്ടുണ്ട്.
2023 ഏപ്രിൽ 25-ന് രാത്രി 8.40-നാണ് (യു എ ഇ സമയം) റാഷിദ് റോവറിനെയും വഹിച്ച് കൊണ്ട് സഞ്ചരിക്കുന്ന ജാപ്പനീസ് ലാൻഡർ വാഹനമായ ‘HAKUTO-R’ ചന്ദ്രോപരിതലത്തിലിറങ്ങുന്നത്. ചന്ദ്രോപരിതലത്തിലെ അറ്റ്ലസ് ക്രേറ്റർ മേഖലയിൽ ഇറങ്ങുന്നതിനാണ് ലാൻഡർ ലക്ഷ്യമിടുന്നത്.
ചന്ദ്രോപരിതലത്തിലിറങ്ങുന്നതിന്റെ പ്രാരംഭനടപടികളുടെ ഭാഗമായി ലാൻഡർ ഏപ്രിൽ 25-ന് വൈകീട്ട് 7:40-ന് അതിന്റെ ഭ്രമണപഥത്തിൽ ആവശ്യമായ മാറ്റങ്ങൾ വരുത്തുന്ന നടപടികൾ കൈക്കൊള്ളുന്നതാണ്. എന്നാൽ ഈ തീയതിയും സമയവും നിരവധി ബാഹ്യഘടകങ്ങളുമായി ബന്ധപ്പെട്ടാണ് നിശ്ചയിക്കപ്പെടുന്നതെന്നും, ഇവയിൽ മാറ്റം വരുന്ന സാഹചര്യങ്ങളിൽ ഏപ്രിൽ 25 എന്ന ലാൻഡിംഗ് തീയതി, സമയം എന്നിവ മാറാമെന്നും MBRSC നേരത്തെ വ്യക്തമാക്കിയിട്ടുണ്ട്.
ഇത്തരം സാഹചര്യങ്ങളിൽ ചന്ദ്രോപരിതലത്തിലിറങ്ങുന്നതിനായി ഏപ്രിൽ 26, മെയ് 1, മെയ് 3 എന്നീ തീയതികളിലൊന്ന് തിരഞ്ഞെടുക്കുമെന്നും MBRSC വ്യക്തമാക്കിയിട്ടുണ്ട്.
Cover Image: WAM.
