ഇന്റർസെക് 2022 (INTERSEC 2022) വാണിജ്യ പ്രദർശനം ദുബായ് വേൾഡ് ട്രേഡ് സെന്ററിൽ ആരംഭിച്ചു. സെക്യൂരിറ്റി, സേഫ്റ്റി, ഫയർ പ്രൊട്ടക്‌ഷൻ മേഖലയിൽ എല്ലാ വർഷവും നടക്കുന്ന വാണിജ്യ പ്രദർശനമായ ഇന്റർസെക്കിന്റെ ഇരുപത്തിമൂന്നാമത് പതിപ്പാണിത്.
2022 ജനുവരി 16-ന് ദുബായ് ബോർഡർ ക്രോസിങ്ങ് പോയ്ന്റ്സ് സെക്യൂരിറ്റി കൗൺസിൽ ചെയർമാൻ H.H. ഷെയ്ഖ് മൻസൂർ ബിൻ മുഹമ്മദ് ബിൻ റാഷിദ് അൽ മക്തൂമാണ് ഈ പ്രദർശനം ഉദ്‌ഘാടനം ചെയ്തത്.
ഈ വർഷത്തെ പ്രദർശനത്തിൽ ഈ മേഖലയിലെ പ്രാദേശികവും, അന്തർദേശീയ തലത്തിലുമുള്ള ഏറ്റവും വലിയ സ്വകാര്യ കമ്പനികളും, സർക്കാർ സ്ഥാപനങ്ങളും പങ്കെടുക്കുന്നുണ്ട്. സുരക്ഷാ മേഖലയിലെ ഏറ്റവും സമഗ്രമായ പ്രദർശനമായ ഇന്റർസെക് 2022-ൽ ഈ മേഖലയിലെ നൂതനമായ ഉത്പന്നങ്ങൾ, സാങ്കേതികവിദ്യകൾ തുടങ്ങിയവ അവതരിപ്പിക്കുന്നതിനൊപ്പം, ഈ മേഖലയിലെ വിദഗ്‌ദ്ധർ അവതരിപ്പിക്കുന്ന സംവാദങ്ങളും ഉൾപ്പെടുത്തിയിരിക്കുന്നു.
ഏറ്റവും നൂതനമായ സുരക്ഷാ ഉപകരണങ്ങൾ, അടിയന്തിര ഘട്ടങ്ങളിൽ ഉപയോഗിക്കുന്ന ഉപകരണങ്ങൾ തുടങ്ങിയവയെക്കുറിച്ച് അടുത്തറിയുന്നതിന് ഈ പ്രദർശനം സഹായകമാണ്. മൂന്ന് ദിവസങ്ങളിലായാണ് ഇന്റർസെക് 2022 സംഘടിപ്പിക്കുന്നത്.
WAM
