ജിദ്ദയിലെ കിംഗ് അബ്ദുൽ അസീസ് വിമാനത്താവളത്തിൽ എത്തുന്ന യാത്രികർക്കായി സൗജന്യ ഓട്ടോമേറ്റഡ് പീപ്പിൾ മൂവർ (APM) എന്ന സ്വയംനിയന്ത്രിത സഞ്ചാര സംവിധാനം പ്രവർത്തനമാരംഭിച്ചു. ജൂൺ 22, തിങ്കളാഴ്ച്ചയാണ് ഈ സംവിധാനം ഉദ്‌ഘാടനം ചെയ്തത്.
വിമാനത്താവളത്തിലെ അറൈവൽ, ഡിപ്പാർച്ചർ കേന്ദ്രങ്ങളിലെ യാത്രികർക്ക് സുഗമമായും, വേഗത്തിലും സഞ്ചാരമൊരുക്കുന്നതിനായാണ് APM ഏർപ്പെടുത്തിയിട്ടുള്ളത്. ടെർമിനൽ ഒന്നിലെ യാത്രികരെ, ചെക്ക്-ഇൻ ഏരിയയിൽ നിന്ന് ബോർഡിങ്ങ് ഏരിയയിലേക്കും തിരികെയും എത്തിക്കുന്നതിനാണ് ഈ സംവിധാനം ഉപയോഗിക്കുന്നത്.
ഏതാണ്ട് ഒരു കിലോമീറ്റർ ദൈർഘ്യമുള്ള APM, ഇതാദ്യമായാണ് സൗദിയിലെ ഒരു വിമാനത്താവളത്തിൽ ഏർപ്പെടുത്തുന്നത്. നിലവിൽ ഈ സംവിധാനത്തിൽ 2 പാളങ്ങളും, 10 ക്യാബിനുകളും ഉണ്ട്. മണിക്കൂറിൽ 4000 യാത്രികർക്ക് APM-ലൂടെ സഞ്ചരിക്കാം.
വിമാനത്താവളത്തിനകത്ത് പ്രവർത്തിക്കുന്ന ഒരു ചെറു മെട്രോ ട്രയിൻ പോലെയുള്ള ഈ സംവിധാനത്തിൽ ഒരേ സമയം 65 പേർക്കാണ് സഞ്ചരിക്കാനാകുക. ചെക്ക്-ഇൻ- ഏരിയയിൽ ബോർഡിങ്ങ് ഏരിയയിലേക്ക് കേവലം 85 സെക്കന്റിൽ യാത്രികർക്ക് എത്തുന്നതിനു APM സഹായകമാകും. ഓരോ മൂന്ന് മിനിറ്റ് കൂടുമ്പോഴും ഇവ സർവീസ് നടത്തുന്നതാണ്.
