ഒമാൻ: വേനൽ ചൂടിൽ തൊഴിലാളികളുടെ സംരക്ഷണമുറപ്പാക്കാൻ ആരോഗ്യ മന്ത്രാലയം തൊഴിലുടമകൾക്ക് നിർദ്ദേശം നൽകി

വേനലിലെ കൊടും ചൂടിൽ, തൊഴിലാളികളുടെ ആരോഗ്യ സുരക്ഷ ഉറപ്പാക്കുന്നതിന് ആവശ്യമായ നടപടികൾ രാജ്യത്തെ തൊഴിലുടമകൾ കൈക്കൊള്ളണമെന്ന് ഒമാൻ ആരോഗ്യ മന്ത്രാലയം നിർദ്ദേശിച്ചു. 2025 ജൂൺ 19-നാണ് ഒമാൻ ആരോഗ്യ മന്ത്രാലയം ഇത് സംബന്ധിച്ച അറിയിപ്പ് നൽകിയത്.

🔹General Recommendations for Preventing #HeatStress

Employers should adhere to the following recommendations to ensure a #SafeSummer without health issues for the workers#A_Leading_Sustainable_Health_for_All pic.twitter.com/eH3u5PClzI
— وزارة الصحة – سلطنة عُمان (@OmaniMOH) June 19, 2025

വേനൽ ചൂടിൽ തൊഴിലാളികളുടെ സംരക്ഷണമുറപ്പാക്കുന്നതിന് കൈക്കൊള്ളാവുന്ന മുൻകരുതൽ നിർദ്ദേശങ്ങൾ ഈ അറിയിപ്പിൽ മന്ത്രാലയം ചൂണ്ടിക്കാട്ടിയിട്ടുണ്ട്. ഇതിനായി താഴെ പറയുന്ന മുൻകരുതൽ നിർദ്ദേശങ്ങൾ പാലിക്കാൻ മന്ത്രാലയം ആവശ്യപ്പെട്ടിട്ടുണ്ട്:

കഠിനമായ ജോലികൾക്കായി രാവിലെയോ, അല്ലെങ്കിൽ ചൂട് കുറഞ്ഞ വൈകുന്നേരങ്ങളോ തിരഞ്ഞെടുക്കുക.
തുറന്ന ഇടങ്ങളിലും, സൂര്യതപം ഏൽക്കാനിടയുള്ള പുറം തൊഴിലിടങ്ങളിലും ജൂൺ, ജൂലൈ, ഓഗസ്റ്റ് മാസങ്ങളിൽ ദിനവും ഉച്ചയ്ക്ക് 12.30 മുതൽ വൈകീട്ട് 3.30 വരെ പ്രവർത്തനങ്ങൾ നിർബന്ധമായും നിർത്തിവെക്കേണ്ടതാണ്. രാജ്യത്തെ കെട്ടിടനിർമ്മാണ മേഖല ഉൾപ്പടെയുള്ള പുറം തൊഴിൽ പ്രവർത്തന മേഖലകളിലെ സ്ഥാപനങ്ങൾക്ക് ഈ നിയന്ത്രണം ബാധകമാണ്.
കൃത്യമായ ഇടവേളകളിൽ തൊഴിലാളികൾക്ക് വിശ്രമം ഉറപ്പാക്കേണ്ടതാണ്. വിശ്രമിക്കുന്നതിനായി തണലുള്ള സ്ഥലം, ചൂട് കുറയ്ക്കുന്നതിനുള്ള ഉചിതമായ വ്യാവസായിക തണുപ്പിക്കൽ സൗകര്യങ്ങൾ മുതലായവ ഉറപ്പാക്കേണ്ടതാണ്.
ചൂട് കൂടുതലുള്ള ഇടങ്ങളിൽ തൊഴിലെടുക്കുന്നവർക്ക് ഓരോ 45/ 60 മിനിറ്റ് കാലയളവിൽ ഇടവേള നൽകേണ്ടതാണ്.
തൊഴിലിടങ്ങളിൽ മതിയായ കുടിവെള്ളം, നിർജ്ജലീകരണം ഒഴിവാക്കുന്നതിനുളള വസ്തുക്കൾ എന്നിവയുടെ ലഭ്യത ഉറപ്പ് വരുത്തേണ്ടതാണ്.
ഇൻഡോർ തൊഴിലിടങ്ങളിൽ എയർകണ്ടിഷൻ അല്ലെങ്കിൽ ഫാൻ എന്നിവ ഉറപ്പാക്കേണ്ടതാണ്.
ഔട്ട്ഡോർ തൊഴിലിടങ്ങളിൽ തണൽ പന്തലുകൾ, പോർട്ടബിൾ ഫാൻ എന്നിവ ഉറപ്പാക്കേണ്ടതാണ്.
സൂര്യാഘാതത്തിന്റെ ലക്ഷണങ്ങൾ, അവ ഉണ്ടാകുന്ന സാഹചര്യങ്ങളിൽ കൈക്കൊള്ളേണ്ട നടപടികൾ എന്നിവയിൽ തൊഴിലാളികൾക്ക് ആവശ്യമായ പരിശീലനം നൽകേണ്ടതാണ്.
ഇതുമായി ബന്ധപ്പെട്ട് ബോധവത്‌കരണ പോസ്റ്ററുകളും മറ്റും തൊഴിലിടങ്ങളിൽ ഉറപ്പ് വരുത്തേണ്ടതാണ്.
തൊഴിലിടങ്ങളിലെ താപനില, ആർദ്രത എന്നിവ ദിനം തോറും നിരീക്ഷിക്കേണ്ടതാണ്.
പ്രമേഹം, ഹൃദ്രോഗം, കിഡ്നിസംബന്ധമായ പ്രശ്‍നങ്ങൾ തുടങ്ങിയ രോഗങ്ങളുള്ള തൊഴിലാളികളെ നേരത്തെ തന്നെ തിരിച്ചറിയേണ്ടതും, ഇവർക്ക് ആവശ്യമായ മുൻകരുതൽ നടപടികൾ ഉറപ്പാക്കേണ്ടതുമാണ്.
സൂര്യാഘാതം ഉണ്ടാകുന്ന സാഹചര്യത്തിൽ കൈക്കൊള്ളേണ്ട മുൻകരുതൽ നടപടികൾ സംബന്ധിച്ച ഒരു അടിയന്തിര പ്രതികരണ പദ്ധതി തയ്യാറാക്കി വെക്കേണ്ടതാണ്.