ഫിഫ വേൾഡ് കപ്പ് ഖത്തർ 2022: മത്സരക്രമ പട്ടിക ഔദ്യോഗികമായി പ്രസിദ്ധീകരിച്ചു

ഫിഫ വേൾഡ് കപ്പ് ഖത്തർ 2022-ന്റെ ഗ്രൂപ്പ് ഘട്ടം നറുക്കെടുപ്പ് 2022 ഏപ്രിൽ 1-ന് ദോഹ എക്സിബിഷൻ ആൻഡ് കൺവെൻഷൻ സെന്ററിൽ വെച്ച് നടന്നു.

FIFA World Cup Qatar 2022 Groups. #QNA#FinalDraw #FIFAWorldCup #Qatar2022 pic.twitter.com/FsslbNOxaq

— Qatar News Agency (@QNAEnglish) April 1, 2022

ഇതുമായി ബന്ധപ്പെട്ട് സംഘടിപ്പിച്ച അതിഗംഭീരമായ ചടങ്ങിൽ ഖത്തർ അമീർ H.H. ഷെയ്ഖ് തമിം ബിൻ ഹമദ് അൽ താനി പങ്കെടുത്തിരുന്നു.

യൂറോപ്പിലെ യുദ്ധ സാഹചര്യങ്ങളും, കൊറോണ വൈറസ് വ്യാപനവും മൂലം യോഗ്യതാ റൌണ്ട് മത്സരങ്ങൾ നീണ്ടതോടെ പ്ലേ-ഓഫ് പൂർത്തിയാക്കുന്നതിന് മുൻപ് തന്നെ ഗ്രൂപ്പ് ഘട്ടം നറുക്കെടുപ്പ് നടത്തുകയായിരുന്നു.

ഏപ്രിൽ 1-ന് നടന്ന ഗ്രൂപ്പ് ഘട്ടം നറുക്കെടുപ്പിൽ ഫിഫ വേൾഡ് കപ്പ് ഖത്തർ 2022-ൽ പങ്കെടുക്കുന്ന ആകെ 32 ടീമുകളിൽ 29 ടീമുകളുടെയും മത്സരക്രമം ഉറപ്പാക്കിയിട്ടുണ്ട്. ശേഷിച്ച 3 ടീമുകളെ ജൂണിൽ നടക്കുന്ന പ്ലേ-ഓഫ് മത്സരങ്ങളുടെ ഫലം അനുസരിച്ച് തിരഞ്ഞെടുക്കുന്നതാണ്.

ഈ മൂന്ന് സ്ഥാനങ്ങൾക്കായി യു എ ഇ, ഓസ്ട്രേലിയ, പെറു, കോസ്റ്റാറിക്ക, ന്യൂസീലാൻഡ്, വെയിൽസ്‌, സ്കോട്ട്ലാൻഡ്, യുക്രൈൻ എന്നീ എട്ട് ടീമുകൾ മത്സരിക്കുന്നതാണ്. ഗ്രൂപ്പ് ബി-യിലെ അവശേഷിക്കുന്ന ഒരു സ്ഥാനത്തിനായി 2022 ജൂണിൽ സ്കോട്ട്ലാൻഡ്, യുക്രൈൻ എന്നീ ടീമുകൾ തമ്മിലുള്ള മത്സരത്തിലെ വിജയിയെ വെയിൽസ്‌ പ്ലേ-ഓഫിൽ നേരിടുന്നതാണ്.

ഗ്രൂപ്പ് ഡി-യിലെ സ്ഥാനത്തിനായി 2022 ജൂൺ 13-ന് നടക്കുന്ന പ്ലേ-ഓഫിൽ പെറു ഏഷ്യൻ പ്ലേ-ഓഫ് നാലാം മത്സരത്തിലെ (ജൂൺ 7-ന് യു എ ഇയും ഓസ്‌ട്രേലിയയും തമ്മിൽ) വിജയിയെ നേരിടുന്നതാണ്. ഗ്രൂപ്പ് ഇ-യിലെ സ്ഥാനത്തിനായി 2022 ജൂൺ 14-ന് നടക്കുന്ന പ്ലേ-ഓഫിൽ കോസ്റ്റാറിക്ക, ന്യൂസീലാൻഡ് എന്നീ ടീമുകൾ മാറ്റുരയ്ക്കുന്നതാണ്.

ഫിഫ വേൾഡ് കപ്പ് ഖത്തർ 2022-ന്റെ ഗ്രൂപ്പ് ഘട്ടം നറുക്കെടുപ്പ് പൂർത്തിയായതോടെ മത്സരക്രമ പട്ടിക ഫിഫ ഔദ്യോഗികമായി തങ്ങളുടെ വെബ്‌സൈറ്റിൽ പ്രസിദ്ധീകരിച്ചിട്ടുണ്ട്. https://digitalhub.fifa.com/m/6a616c6cf19bc57a/original/FWC-2022-Match-Schedule.pdf എന്ന വിലാസത്തിൽ നിന്ന് ഈ പട്ടിക ലഭ്യമാണ്. 2022 നവംബർ 21-ന് നടക്കുന്ന ഫിഫ വേൾഡ് കപ്പ് ഖത്തർ 2022-ന്റെ ഉദ്‌ഘാടന മത്സരത്തിൽ ആതിഥേയരായ ഖത്തർ ഇക്വഡോറുമായി അൽ ബെയ്ത് സ്റ്റേഡിയത്തിൽ ഏറ്റുമുട്ടുന്നതാണ്.