കിംഗ് ഖാലിദ് ഇന്റർനാഷണൽ എയർപോർട്ടിലൂടെ സൗദി അറേബ്യയിലേക്ക് പ്രവേശിക്കുന്ന സന്ദർശകർക്ക് സ്വാഗതമോതുന്നതിനായി പാസ്സ്പോർട്ടിൽ റിയാദ് സീസണുമായി ബന്ധപ്പെട്ട പ്രത്യേക എൻട്രി സ്റ്റാമ്പ് പതിപ്പിച്ച് നൽകുന്നു. സൗദി പ്രസ് ഏജൻസിയാണ് ഇക്കാര്യം റിപ്പോർട്ട് ചെയ്തത്.
ഈ എൻട്രി സ്റ്റാമ്പിന്റെ നടുവിലായി റിയാദ് സീസണിന്റെ ലോഗോ ഉൾപ്പെടുത്തിയിട്ടുണ്ട്. ഇതോടൊപ്പം സന്ദർശകരെ സൗദി അറേബ്യയിലേക്ക് സ്വാഗതം ചെയ്തുകൊണ്ടുള്ള സന്ദേശവും ഇതിൽ ഉൾപ്പെടുത്തിയിരിക്കുന്നു.
വിദേശത്ത് നിന്നെത്തുന്ന സന്ദർശകർക്ക് റിയാദ് സീസണെക്കുറിച്ച് അറിവ് നൽകുന്നതിനും, വിനോദസഞ്ചാരികൾക്കിടയിൽ ഈ മേളയുടെ പ്രാധാന്യം എടുത്ത് കാട്ടുന്നതിനുമായാണ് ഈ നടപടി.
റിയാദ് സീസൺ 2021-ന്റെ ഭാഗമായി സംഘടിപ്പിക്കപ്പെട്ട വിവിധ പരിപാടികളിൽ ഇതുവരെ പതിനൊന്ന് ദശലക്ഷത്തിലധികം സന്ദർശകർ പങ്കെടുത്തിട്ടുണ്ട്. 2021 ഒക്ടോബർ 20-നാണ് റിയാദ് സീസൺ 2021 ആരംഭിച്ചത്.
പശ്ചിമേഷ്യന്‍ പ്രദേശങ്ങളിൽ സംഘടിപ്പിക്കപ്പെടുന്ന ഏറ്റവും വലിയ വിനോദ പരിപാടികളിലൊന്നാണ് റിയാദ് സീസൺ. ഏതാണ്ട് 5.4 ദശലക്ഷം സ്‌ക്വയർ മീറ്ററിൽ പരന്ന് കിടക്കുന്ന റിയാദ് സീസൺ വേദിയിൽ 14 വ്യത്യസ്ത വിനോദ മേഖലകൾ ഒരുക്കിയിട്ടുണ്ട്. 7500-ഓളം വിനോദ പ്രദർശനങ്ങൾ, ആഘോഷ പരിപാടികൾ തുടങ്ങിയവയാണ് ഈ മേളയുടെ ഭാഗമായി അരങ്ങേറുന്നത്. ഇത്തവണത്തെ റിയാദ് സീസൺ 2022 മാർച്ച് വരെ സന്ദർശകരെ സ്വീകരിക്കുന്നതാണ്.
Cover Image: Saudi Press Agency.
