രാജ്യത്തെ മുഴുവൻ നിവാസികൾക്കും COVID-19 വാക്സിൻ നൽകുന്ന ആദ്യ രാജ്യമാകുന്നതിനാണ് യു എ ഇ ലക്ഷ്യമിടുന്നതെന്ന് നാഷണൽ എമർജൻസി, ക്രൈസിസ് ആൻഡ് ഡിസാസ്റ്റർ മാനേജ്‌മന്റ് അതോറിറ്റി (NCEMA) വ്യക്തമാക്കി. ജനുവരി 26, ചൊവ്വാഴ്ച്ചയാണ് NCEMA ഇത് സംബന്ധിച്ച അറിയിപ്പ് നൽകിയത്.
രാജ്യത്തെ മുഴുവൻ നിവാസികളും കൊറോണ വൈറസിനെതിരായ പ്രതിരോധ ശേഷി നേടുന്നതിനാണ് ഇതിലൂടെ ലക്‌ഷ്യം വെക്കുന്നതെന്ന് NCEMA വ്യക്തമാക്കി. ഇത് രാജ്യത്തെ രോഗബാധിതരുടെ എണ്ണം കുറയ്ക്കുന്നതിനും, വൈറസ് വ്യാപനം തടയുന്നതിനും സഹായകമാകുമെന്ന് NCEMA കൂട്ടിച്ചേർത്തു.
ദേശീയ വാക്സിനേഷൻ യത്നത്തിന്റെ ഭാഗമായി 2021-ലെ ആദ്യ മൂന്ന് മാസത്തിനകം രാജ്യത്തെ ആകെ ജനസംഖ്യയുടെ 50 ശതമാനത്തിൽ പരം പേർക്ക് വാക്സിൻ കുത്തിവെപ്പ് നൽകുന്നതിനാണ് ലക്ഷ്യമിടുന്നതെന്നും NCEMA അറിയിച്ചു. രാജ്യത്തുടനീളം 205-ൽ പരം കേന്ദ്രങ്ങളിൽ നിന്ന് വാക്സിൻ സൗജന്യമായി നൽകിവരുന്നതായും NCEMA കൂട്ടിച്ചേർത്തു. നിലവിൽ സിനോഫാം, ഫൈസർ, സ്പുട്നിക് എന്നീ COVID-19 വാക്സിനുകളാണ് യു എ ഇയിൽ നൽകുന്നത്.
ഈ വാക്സിനുകളുടെ സുരക്ഷ സംബന്ധിച്ച് സമഗ്രമായ പഠനങ്ങൾക്ക് ശേഷമാണ് ഇവ ദേശീയ വാക്സിനേഷൻ യത്നത്തിന്റെ ഭാഗമാക്കിയതെന്നും NCEMA വ്യക്തമാക്കി. കഴിഞ്ഞ വാരത്തിൽ ശരാശരി 100-ൽ 6.06 പേർക്ക് എന്ന നിരക്കിലാണ് വാക്സിൻ നൽകിയതെന്നും അതോറിറ്റി കൂട്ടിച്ചേർത്തു.
