കേരളത്തിന്റെ സാമൂഹിക ചരിത്രത്തിലെ വനിതാ മുന്നേറ്റത്തിന്റെ ദൃശ്യാവിഷ്‌കാരവുമായി ‘വിമോചനത്തിന്റെ പാട്ടുകാർ’ ഡോക്യുഫിക്ഷന്റെ ആദ്യ പ്രദർശനവും ഉദ്ഘാടനവും ഇന്ന്( 21 ന്) മുഖ്യമന്ത്രി പിണറായി വിജയൻ നിർവഹിക്കുമെന്ന് ആരോഗ്യമന്ത്രി കെ.കെ.ശൈലജ ടീച്ചർ വാർത്താ സമ്മേളനത്തിൽ പറഞ്ഞു. വഴുതക്കാട് ടാഗോർ തീയേറ്ററിൽ വൈകിട്ട് ഏഴിന് നടക്കുന്ന ചടങ്ങിൽ ആരോഗ്യമന്ത്രി അധ്യക്ഷത വഹിക്കും.
‘സധൈര്യം മുന്നോട്ട്’ പരിപാടിയുടെ ഭാഗമായി വനിതാ ശിശു വികസന വകുപ്പും കേരള സംസ്ഥാന വനിതാ വികസന കോർപ്പറേഷനും ഇൻഫർമേഷൻ ആൻഡ് പബ്ലിക്ക് റിലേഷൻസ് വകുപ്പും സംയുക്തമായാണ് ഡോക്യുഫിക്ഷൻ നിർമ്മിച്ചിരിക്കുന്നത്. പ്രശസ്ത സിനിമാ സംവിധായിക വിധു വിൻസന്റാണ് സംവിധാനം. പത്തൊൻപതാം നൂറ്റാണ്ടിന്റെ അവസാനവും ഇരുപതാം നൂറ്റാണ്ടിന്റെ തുടക്കത്തിലും കേരളത്തിലുണ്ടായ നേട്ടങ്ങളിലും മുന്നേറ്റങ്ങളിലും സ്ത്രീകൾ വഹിച്ച സജീവ സാന്നിധ്യമാണ് ഡോക്യുഫിക്ഷനിലൂടെ വ്യക്തമാക്കുന്നത്.
സാമൂഹ്യ പരിഷ്‌കരണ പ്രസ്ഥാനത്തെക്കുറിച്ചും ആധുനിക കേരള സ്ത്രീ രൂപപ്പെട്ടതിനെക്കുറിച്ചും ഇന്ന് അവർ എത്തി നിൽക്കുന്ന ഇടം നേടിയതെങ്ങനെയെന്നും യുവതലമുറയ്ക്ക് അറിവ് പകരുന്നതിനും ഈ മുന്നേറ്റത്തിന് വഴിയൊരുക്കിയ മുൻകാല സ്ത്രീകളെ ചരിത്രത്തിൽ രേഖപ്പെടുത്തുന്നതിനും ഉദ്ദേശിച്ചാണ് ചിത്രം നിർമ്മിച്ചിരിക്കുന്നത്. ശീർഷകത്തിൽ സൂചിപ്പിച്ചിരിക്കുന്നതുപോലെ, സംഗീതം ഒരു സ്ത്രീയെയും അവളുടെ ചെറുമകളെയും വിമോചനത്തിന്റെ പാട്ടുകളാൽ ബന്ധിപ്പിക്കുന്നു.
വൈകിട്ട് മൂന്നരയ്ക്ക് ശേഷം നഗരത്തിലെ ആനീമസ്‌ക്രീൻ സ്‌ക്വയർ, അക്കാമ്മചെറിയാൻ സ്‌ക്വയർ, ഇ.എം.എസ് പാർക്ക്, രക്ത സാക്ഷി മണ്ഡപം എന്നിവിടങ്ങളിൽ കഴിഞ്ഞകാല മുന്നേറ്റങ്ങളിൽ പങ്കെടുത്ത സ്ത്രീ പോരാളികൾക്ക് വേണ്ടി ഉയർത്തിയ സ്മൃതികുടീരങ്ങളിൽ പുഷ്പാർച്ചനയും വനിതകളുടെ വാദ്യ മേളവും നടക്കും. പ്രമുഖ കലാകാരികളായ പി.കെ. മേദിനി, വിധുവിൻസന്റ്, ശ്രുതി നമ്പൂതിരി, ദിവ്യ ഗോപിനാഥ് എന്നിവരുടെ നേതൃത്വത്തിലാണ് പുഷ്പാർച്ചന നടക്കുന്നത്.
പ്രധാന വേദിയായ ടാഗോർ തിയേറ്ററിന്റെ അങ്കണത്തിൽ ഉയർത്തിയ സ്മൃതി മണ്ഡപത്തിൽ വൈകിട്ട് നാലിന് പിന്നണി ഗായിക സയനോരയുടെ നേതൃത്വത്തിൽ പുഷ്പാർച്ചന നടക്കും. തുടർന്ന് സംസ്ഥാനത്തെ വിവിധ കോളേജുകളിലെ വിദ്യാർത്ഥികളുടെ കലാപരിപാടികൾ അരങ്ങേറും. ആറിന് കേരള സ്ത്രീ ഇന്നലെ, ഇന്ന്, നാളെ എന്ന വിഷയത്തിൽ, സംസ്ഥാന സർക്കാരിന്റെ ജെണ്ടർ അഡൈ്വസർ ഡോ. ടി.കെ. ആനന്ദി നയിക്കുന്ന സംവാദം നടക്കും.
ഹരിതകേരള മിഷൻ ഉപാദ്ധ്യക്ഷ ഡോ. ടി.എൻ. സീമ, ചലച്ചിത്ര സംവിധായകൻ ശങ്കർ രാമകൃഷ്ണൻ, സംവിധായിക ശ്രുതി നമ്പൂതിരി, ചലച്ചിത്ര താരം ദിവ്യ ഗോപിനാഥ് എന്നിവർ പങ്കെടുക്കും. ഡോക്യുഫിക്ഷൻ പ്രദർശനത്തിന് ശേഷം ചുമട് താങ്ങി ബാൻഡ് ട്രൂപ്പിന്റെ നേതൃത്വത്തിൽ സംഗീത നിശ അരങ്ങേറും. തുടർന്ന് വനിതകളുടെ രാത്രി നടത്തവും ഉണ്ടായിരിക്കും. സാമൂഹ്യനീതി, വനിത ശിശുവികസന വകുപ്പ് സെക്രട്ടറി ബിജു പ്രഭാകർ, വനിത വികസന കോർപ്പറേഷൻ ചെയർപേഴ്‌സൺ കെ.എസ്.സലീഖ, ഐ.ആന്റ്പി.ആർ.ഡി. ഡയറക്ടർ യു.വി.ജോസ്, വനിത ശിശു വികസന വകുപ്പ് ഡയറക്ടർ ടി.വി.അനുപമ, വനിത വികസന കോർപ്പറേഷൻ എം.ഡി. വി.സി. ബിന്ദു തുടങ്ങിയവർ ഉദ്ഘാടന ചടങ്ങിൽ സംബന്ധിക്കും. വനിത വികസന കോർപ്പറേഷൻ എം.ഡി. വി.സി. ബിന്ദു, ജെൻഡർ അഡൈ്വസർ ഡോ. ടി.കെ. ആനന്ദി എന്നിവർ പത്രസമ്മേളനത്തിൽ പങ്കെടുത്തു.
