എമിറേറ്റിലെ പൊതു ജലഗതാഗത സേവനങ്ങൾക്കുള്ള ഓൺലൈൻ ബുക്കിംഗ് പ്ലാറ്റ്ഫോം ആരംഭിച്ചതായി അബുദാബി മാരിടൈം അതോറിറ്റി അറിയിച്ചു. 2023 മാർച്ച് 20-നാണ് അതോറിറ്റി ഇത് സംബന്ധിച്ച അറിയിപ്പ് നൽകിയത്.
അബുദാബി ഡിപ്പാർട്മെന്റ് ഓഫ് മുനിസിപ്പാലിറ്റീസ് ആൻഡ് ട്രാൻസ്പോർട്ടുമായി ചേർന്നാണ് അതോറിറ്റി ഈ സംവിധാനം ആരംഭിച്ചിരിക്കുന്നത്. ഈ ഓൺലൈൻ സംവിധാനത്തിലൂടെ അബുദാബിയിലെ എല്ലാ പൊതു ജലഗതാഗത റൂട്ടുകളിലെയും യാത്രികർക്ക് സേവനങ്ങൾ ലഭ്യമാകുന്നതാണ്.
https://tickets-booking.admaritime.ae/#/en/ എന്ന വിലാസത്തിലാണ് ഈ ഓൺലൈൻ ബുക്കിംഗ് പ്ലാറ്റ്ഫോം ലഭ്യമാക്കിയിരിക്കുന്നത്. ഈ സംവിധാനം ഉപയോഗിച്ച് കൊണ്ട് യാത്രികർക്ക് തങ്ങൾക്ക് ഇഷ്ടമുള്ള സീറ്റുകൾ മുൻകൂട്ടി തിരഞ്ഞെടുക്കുന്നതും, ഓൺലൈനിലൂടെ ടിക്കറ്റ് നിരക്കുകൾ നൽകുന്നതും, ബുക്കിംഗ് സംബന്ധിച്ച വിവരങ്ങൾ നോട്ടിഫികേഷനായി ലഭിക്കുന്നതും ഉൾപ്പടെയുള്ള സേവനങ്ങൾ നേടാവുന്നതാണ്.
ഉപഭോക്താക്കൾക്ക് ഒരു ഗസ്റ്റ് യൂസർ എന്ന രീതിയിലോ, അല്ലെങ്കിൽ ഇമെയിൽ ഐഡി രജിസ്ട്രേഷൻ ഉപയോഗിച്ചോ, യു എ ഇ പാസ്, ഫേസ്ബുക്ക് അല്ലെങ്കിൽ ഗൂഗിൾ ക്രെഡൻഷ്യലുകൾ ഉപയോഗിച്ചോ ഈ സേവനം പ്രയോജനപ്പെടുത്താവുന്നതാണ്.
WAM
