യു എ ഇയുടെ തീരദേശമേഖലയുടെ പൈതൃകത്തിന്റെ ഉത്സവമായ അബുദാബി മാരിടൈം ഹെറിറ്റേജ് ഫെസ്റ്റിവലിന്റെ മൂന്നാമത് പതിപ്പ് 2024 ഫെബ്രുവരി 23 മുതൽ ആരംഭിക്കും. 2024 ഫെബ്രുവരി 21-ന് വൈകീട്ട് അബുദാബി മീഡിയ ഓഫീസാണ് ഇക്കാര്യം അറിയിച്ചത്.
ഫെബ്രുവരി 23-ന് ആരംഭിക്കുന്ന അബുദാബി മാരിടൈം ഹെറിറ്റേജ് ഫെസ്റ്റിവൽ മാർച്ച് 3 വരെ നീണ്ട് നിൽക്കും. അബുദാബി ഡിപ്പാർട്മെന്റ് ഓഫ് കൾച്ചർ ആൻഡ് ടൂറിസത്തിന്റെ കീഴിൽ ഒരുക്കുന്ന ഈ മേള അബുദാബി കോർണിഷിലെ അൽ ബഹറിൽ വെച്ചാണ് സംഘടിപ്പിക്കുന്നത്.
ഈ സാംസ്‌കാരിക മേളയിൽ യു എ ഇയുടെ തീരദേശമേഖലയുടെ പരമ്പരാഗത ജീവിതരീതികൾ, പൈതൃക അടയാളങ്ങൾ, ചരിത്രം എന്നിവ പുനഃസൃഷ്ടിക്കപ്പെടുന്നതാണ്. ഈ മേഖലയിൽ അധിവസിക്കുന്നവരുടെ കരകൗശല സമ്പ്രദായങ്ങൾ, കലാരൂപങ്ങൾ, സംഗീതം, കഥാകഥനം, പരമ്പരാഗത ഭക്ഷണശീലങ്ങൾ എന്നിവ അടുത്തറിയുന്നതിനും ഈ മേഖലയിലെ പരമ്പരാഗത ചന്തകൾ നേരിട്ട് കാണുന്നതിനും സന്ദർശകർക്ക് അവസരം ലഭിക്കുന്നു.
Cover Image: WAM.
