കള്ളപ്പണം തടയുന്നതിനുള്ള നടപടികൾ കടുപ്പിക്കുന്നതിന്റെ ഭാഗമായി യു എ ഇ സെൻട്രൽ ബാങ്ക് (CBUAE) ആറ് എക്സ്ചേഞ്ച് ഹൗസുകൾക്ക് 12.3 ദശലക്ഷം ദിർഹത്തിന്റെ സാമ്പത്തിക ഉപരോധം ഏർപ്പെടുത്തി. എമിറേറ്റ്സ് ന്യൂസ് ഏജൻസിയാണ് ഇക്കാര്യം റിപ്പോർട്ട് ചെയ്തത്.
കള്ളപ്പണം വെളുപ്പിക്കൽ തടയുന്നതിനും, തീവ്രവാദത്തിനും, നിയമവിരുദ്ധ സംഘടനകൾക്കും ധനസഹായം നൽകുന്നത് തടയുന്നതിനുമുള്ള (AML/CFT) ഫെഡറൽ ഡിക്രി നിയമം ’20/2018′ അനുസരിച്ചാണ് ഈ നടപടി.
ഈ എക്സ്ചേഞ്ച് ഹൗസുകൾ AML/CFT ചട്ടക്കൂടും അനുബന്ധ നിയന്ത്രണങ്ങളും പാലിക്കുന്നതിൽ വീഴ്ച വരുത്തിയതായി CBUAE കണ്ടെത്തിയിരുന്നു. ഇതിനെത്തുടർന്നാണ് ഇവർക്കെതിരെ സാമ്പത്തിക ഉപരോധം ഏർപ്പെടുത്തിയത്.
എല്ലാ എക്സ്ചേഞ്ച് ഹൗസുകളും അവയുടെ ഉടമകളും ജീവനക്കാരും യു എ ഇ നിയമങ്ങളും ചട്ടങ്ങളും മാനദണ്ഡങ്ങളും പാലിക്കുന്നുണ്ടെന്ന് ഉറപ്പാക്കാനും, അതിലൂടെ സാമ്പത്തിക ഇടപാടുകളുടെ സുതാര്യതയും സമഗ്രതയും നിലനിർത്തുന്നതിനും CBUAE ലക്ഷ്യമിടുന്നു.
WAM
