രാജ്യത്ത് 624 ചരിത്രപ്രധാനമായതും, പുരാവസ്തുപരമായി പ്രാധാന്യമുള്ളതുമായ ഇടങ്ങൾ നാഷണൽ ആന്റിക്വിറ്റീസ് രജിസ്റ്ററിന് കീഴിൽ സൗദി ഹെറിറ്റേജ് കമ്മിഷൻ പുതിയതായി ഉൾപ്പെടുത്തി. സൗദി പ്രസ് ഏജൻസിയാണ് ഇക്കാര്യം റിപ്പോർട്ട് ചെയ്തത്.
2021-ലെ ആദ്യ മൂന്ന് മാസത്തിനിടെയാണ് ഈ പുതിയ പുരാവസ്തു സൈറ്റുകൾ ഹെറിറ്റേജ് കമ്മിഷൻ രജിസ്റ്റർ ചെയ്തത്. ഇതോടെ സൗദിയിൽ ഇത്തരത്തിൽ രജിസ്റ്റർ ചെയ്തിട്ടുള്ള പുരാവസ്തുപരമായി പ്രാധാന്യമുള്ള ഇടങ്ങളുടെ എണ്ണം 8176 ആയിട്ടുണ്ട്.
പുതിയതായി രജിസ്റ്റർ ചെയ്ത പുരാവസ്തു സൈറ്റുകളിൽ 38 ഇടങ്ങൾ മക്കയിലും, 5 ഇടങ്ങൾ മദീനയിലും, 48 ഇടങ്ങൾ ഹൈലിലും, 54 ഇടങ്ങൾ അൽ ജൗഫിലും, 52 ഇടങ്ങൾ അസിറിലും, 35 ഇടങ്ങൾ തബൂക്കിലുമാണ് സ്ഥിതിചെയ്യുന്നത്. നോർത്തേൺ ബോർഡേഴ്സ് മേഖലയിൽ 4, റിയാദിൽ 342, ഈസ്റ്റേൺ റീജിയണിൽ 25, ഖാസിമിൽ 18, ജസാനിൽ 3 വീതം പുരാവസ്തു സൈറ്റുകൾ രജിസ്റ്റർ ചെയ്തിട്ടുണ്ട്. ഹെറിറ്റേജ് കമ്മിഷൻ സി ഇ ഓ ഡോ. ജസീർ അൽ ഹെർബിഷാണ് ഇക്കാര്യം അറിയിച്ചത്.
സൗദിയിലെ ഇത്തരം പൗരാണിക ഇടങ്ങളുടെ ചരിത്രരേഖകൾ കണ്ടെത്തുന്നതിനും, അവയെ ഡിജിറ്റൽ സംവിധാനങ്ങളിലൂടെ കൃത്യമായി രേഖപ്പെടുത്തുന്നതിനുമായാണ് ഈ രജിസ്‌ട്രേഷൻ നടപടിയെന്ന് അദ്ദേഹം വ്യക്തമാക്കി. പുരാവസ്തുപരമായി പ്രാധാന്യമുള്ള ഇത്തരം ഇടങ്ങൾ സംബന്ധിച്ച വിവരങ്ങൾ ശേഖരിക്കുന്നതിലും, ഇവയെ ഡിജിറ്റൽ മാപ്പുകളിൽ രേഖപ്പെടുത്തുന്നതിനും, ഇവയുടെ ഡാറ്റാബേസ് നിർമ്മിക്കുന്നതിനും, ഇത്തരം ഇടങ്ങളെ സംരക്ഷിക്കുന്നതിനും നാഷണൽ ആന്റിക്വിറ്റീസ് രജിസ്റ്റർ വളരെ പ്രധാനമാണെന്ന് അദ്ദേഹം ചൂണ്ടിക്കാട്ടി.
