2021 ജൂലൈ 4, ഞായറാഴ്ച്ച മുതൽ യു എ ഇയിൽ നിന്ന് സൗദിയിലേക്കും, തിരികെയുമുള്ള വിമാനസർവീസുകൾ താത്കാലികമായി നിർത്തിവെക്കുന്നതായി എമിറേറ്റ്സ്, ഇത്തിഹാദ് എന്നീ വിമാനക്കമ്പനികൾ വ്യക്തമാക്കി. ഇനി ഒരു അറിയിപ്പുണ്ടാകുന്നത് വരെയാണ് ഈ തീരുമാനം.
സൗദി അധികൃതരിൽ നിന്നുള്ള ഏറ്റവും പുതിയ അറിയിപ്പുകൾ പ്രകാരം, 2021 ജൂലൈ 4, 11PM മുതൽ ഇനി ഒരു അറിയിപ്പുണ്ടാകുന്നത് വരെ സൗദി – യു എ ഇ വിമാനസർവീസുകൾ നിർത്തിവെക്കുന്നതായി ഇത്തിഹാദ് അറിയിച്ചു.
ജൂലൈ 4 23:00 മുതൽ ഇനി ഒരു അറിയിപ്പ് ഉണ്ടാകുന്നത് വരെ സൗദിയിലേക്കുള്ള വിമാനസർവീസുകൾ നിർത്തലാക്കിയതായി എമിറേറ്റ്സ് എയർലൈനും വ്യക്തമാക്കിയിട്ടുണ്ട്.
യു എ ഇ, എത്യോപ്യ, വിയറ്റ്നാം എന്നീ രാജ്യങ്ങളിൽ നിന്ന് സൗദിയിലേക്കും, തിരികെയുമുള്ള വിമാനസർവീസുകൾക്ക് ജൂലൈ 4, ഞായറാഴ്ച്ച 11PM മുതൽ വിലക്കേർപ്പെടുത്താൻ സൗദി അറേബ്യ തീരുമാനിച്ച സാഹചര്യത്തിലാണ് യു എ ഇ വിമാനക്കമ്പനികൾ സർവീസുകൾ നിർത്തലാക്കുന്നത്.
ഈ രാജ്യങ്ങളിലേക്കും, തിരികെയുമുള്ള യാത്രകൾക്ക് താത്കാലിക വിലക്കേർപ്പെടുത്താൻ തീരുമാനിച്ചതായി സൗദി ആഭ്യന്തര മന്ത്രാലയം ജൂലൈ 3-ന് പുലർച്ചെ അറിയിച്ചിരുന്നു. COVID-19 വൈറസിന്റെ പുതിയ വകഭേദവുമായി ബന്ധപ്പെട്ട വ്യാപന സാധ്യതകൾ കണക്കിലെടുത്താണ് ഈ തീരുമാനം.
Cover Photo: @etihad
