വംശനാശഭീഷണി നേരിടുന്ന മലയൻ കടുവകളുടെ സംരക്ഷണത്തിനായി മലേഷ്യയുമായി യു എ ഇ കൈകോർക്കുന്നു. എമിറേറ്റ്സ് ന്യൂസ് ഏജൻസിയാണ് ഇക്കാര്യം റിപ്പോർട്ട് ചെയ്തത്.
ഇതിനായി മുഹമ്മദ് ബിൻ സായിദ് സ്പീഷീസ് കൺസർവേഷൻ ഫണ്ട് (MBZF) എൻഗാങ് മാനേജ്‌മെന്റ് സർവീസസ് എന്നിവർ ഒരു കരാറിൽ ഒപ്പ് വെച്ചിട്ടുണ്ട്. ഗുരുതരമായി വംശനാശഭീഷണി നേരിടുന്ന മലയൻ കടുവയെയും മറ്റ് അപൂർവ ജീവജാലങ്ങളെയും സംരക്ഷിക്കുന്നതിനായുള്ള തെക്കുകിഴക്കൻ ഏഷ്യയിലെ ആദ്യത്തെ കടുവ സംരക്ഷണ കേന്ദ്രം സ്ഥാപിക്കുന്നതിന് വ്യവസ്ഥ ചെയ്യുന്നതാണ് ഈ കരാർ.
അബുദാബി കിരീടാവകാശി H.H. ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാൻ, പഹാങ്ങിലെ റീജന്റായ പ്രിൻസ് തെങ്കു ഹസ്സനാൽ ഇബ്രാഹിം ആലം ഷാ, പ്രസിഡൻഷ്യൽ കോർട്ട് ഫോർ ഡെവലപ്‌മെന്റ് ആൻഡ് ഫാളൻ ഹീറോസ് അഫയേഴ്‌സിന്റെ ഡെപ്യൂട്ടി ചെയർമാനും ഇന്റർനാഷണൽ ഹ്യൂമാനിറ്റേറിയൻ അഫയേഴ്‌സ് കൗൺസിൽ ചെയർമാനുമായ H.H. ഷെയ്ഖ് തിയാബ് ബിൻ മുഹമ്മദ് ബിൻ സായിദ് അൽ നഹ്യാൻ എന്നിവരുടെ സാന്നിദ്ധ്യത്തിലാണ് ഈ കരാർ ഒപ്പ് വെച്ചത്.
അബുദാബി സുസ്ഥിരതാ വാരത്തിന്റെ ഭാഗമായാണ് ഈ സുപ്രധാന കരാർ ഒപ്പ് വെച്ചത്. ഇത് പ്രകാരം എംഗാങ് മാനേജ്‌മെന്റ് സർവീസസിന് MBZF-ൽ നിന്ന് അഞ്ച് വർഷത്തേക്ക് 22 മില്യൺ യുഎസ് ഡോളർ ഗ്രാന്റ് ലഭിക്കുന്നതാണ്.
തമൻ നെഗാര ദേശീയോദ്യാനത്തിന് അടുത്തായി സ്ഥിതി ചെയ്യുന്നതും 1,340 ചതുരശ്ര കിലോമീറ്റർ വിസ്തൃതിയുള്ളതുമായ അൽ-സുൽത്താൻ അബ്ദുല്ല റോയൽ ടൈഗർ റിസർവിനെ ഈ ധനസഹായം പിന്തുണയ്ക്കും. മലേഷ്യയിലെ വംശനാശഭീഷണി നേരിടുന്ന മലയൻ കടുവയെയും മറ്റ് വംശനാശഭീഷണി നേരിടുന്ന വന്യജീവികളെയും സംരക്ഷിക്കുന്നതിന് ഈ സംരംഭം അനുകൂലമായ അന്തരീക്ഷം നൽകും.
ജൈവവൈവിധ്യം സംരക്ഷിക്കുന്നതിലും, സംരക്ഷണ പ്രവർത്തനങ്ങൾ വർദ്ധിപ്പിക്കുന്നതിലും, ആവാസവ്യവസ്ഥയെ സ്ഥിരപ്പെടുത്തുന്നതിലും ഈ കരാർ നൽകുന്ന പ്രാധാന്യം ഷെയ്ഖ് തിയാബ് ബിൻ മുഹമ്മദ് ബിൻ സായിദ് എടുത്തുപറഞ്ഞു.
ഐയുസിഎൻ റെഡ് ലിസ്റ്റ് ഓഫ് ത്രെട്ടൻഡ് സ്പീഷീസ് പ്രകാരം വംശനാശഭീഷണി നേരിടുന്ന മലയൻ കടുവ കാടുകളിൽ ആകെ 150-ൽ എണ്ണം മാത്രമേ അവശേഷിക്കുന്നുള്ളൂ, കഴിഞ്ഞ നൂറ്റാണ്ടിൽ വേട്ടയാടലും ആവാസവ്യവസ്ഥയുടെ നഷ്ടവും കാരണം ഇവയുടെ എണ്ണം 97 ശതമാനം കുറഞ്ഞു.
“കടുവകളുടെ എണ്ണം ഈ നിരക്കിൽ കുറയുന്നത് തുടർന്നാൽ, ഏതാനും വർഷങ്ങൾക്കുള്ളിൽ അവയുടെ വംശനാശം സംഭവിക്കുമെന്ന് വിദഗ്ധർ പ്രവചിക്കുന്നു. എന്നിരുന്നാലും, സമയോചിതമായ ഇടപെടൽ വംശനാശത്തിന്റെ വക്കിലുള്ള ജീവികളെ പുനഃസ്ഥാപിച്ച വിജയഗാഥകളുണ്ട്. അൽ-സുൽത്താൻ അബ്ദുള്ള റോയൽ ടൈഗർ റിസർവിനെ പിന്തുണയ്ക്കുന്നതിനുള്ള ഈ സംരംഭം മലയൻ കടുവയുടെ ഭാവി സുരക്ഷിതമാക്കുന്നതിനുള്ള ഒരു നിർണായക ചുവടുവയ്പ്പാണ്,” മുഹമ്മദ് ബിൻ സായിദ് ഫണ്ട് ഫോർ നേച്ചറിന്റെ എക്സിക്യൂട്ടീവ് മാനേജിംഗ് ഡയറക്ടർ റസാൻ ഖലീഫ അൽ മുബാറക് പറഞ്ഞു.
മലയൻ കടുവകൾക്ക് പുറമെ കാട്ടുപൂച്ചകൾ, ആനകൾ, ടാപ്പിറുകൾ, സൺ ബിയറുകൾ, ഗൗർ, വിവിധ പക്ഷി ഇനങ്ങൾ എന്നിവയുൾപ്പെടെയുള്ള മറ്റ് അപൂർവവും വംശനാശഭീഷണി നേരിടുന്നതുമായ മൃഗങ്ങൾക്കും ഈ സംരക്ഷണ നടപടികൾ പ്രയോജനപ്പെടുന്നതാണ്.
WAM
