പതിനെട്ടാമത് ലിവ ഡേറ്റ് ഫെസ്റ്റിവൽ 2022 ജൂലൈ 16 മുതൽ ആരംഭിക്കുമെന്ന് അബുദാബി മീഡിയ ഓഫീസ് അറിയിച്ചു. 2022 ജൂലൈ 5-നാണ് അബുദാബി മീഡിയ ഓഫീസ് ഇക്കാര്യം അറിയിച്ചത്.
2022 ജൂലൈ 16-ന് ആരംഭിക്കുന്ന പതിനെട്ടാമത് ലിവ ഡേറ്റ് ഫെസ്റ്റിവൽ ജൂലൈ 24 വരെ നീണ്ടുനിൽക്കും. അൽ ദഫ്‌റയിലെ, ലിവയിൽ നടക്കുന്ന ഈ ഈന്തപ്പഴ മഹോത്സവം, ഗൾഫ് മേഖലയിലെ ഏറ്റവും വലിയ ഈന്തപ്പഴ പ്രദര്‍ശനങ്ങളിലൊന്നാണ്.
അബുദാബി കൾച്ചറൽ പ്രോഗ്രാംസ് ആൻഡ് ഹെറിറ്റേജ് ഫെസ്റ്റിവൽസ് കമ്മിറ്റിയുടെ നേതൃത്വത്തിലാണ് ഈ ഈന്തപ്പഴ പ്രദര്‍ശനം സംഘടിപ്പിക്കുന്നത്. അൽ ദഫ്‌റയിലെ, ലിവ സിറ്റിയിൽ നടക്കുന്ന ഈ പ്രദർശനം എമിറാത്തി സാംസ്‌കാരികത്തനിമയുടെ പ്രതീകമായി ഈന്തപ്പഴത്തെ ഉയർത്തിക്കാട്ടുന്നതിനുള്ള അബുദാബിയുടെ ശ്രമങ്ങളുടെ ഭാഗമാണ്.
എല്ലാ വർഷവും അറുപതിനായിരത്തിൽ പരം സന്ദർശകർ പങ്കെടുക്കാറുള്ള ലിവ ഡേറ്റ് ഫെസ്റ്റിവൽ, ഗൾഫ് മേഖലയിൽ നിന്നുള്ള മുന്തിയ ഈന്തപ്പഴ ഇനങ്ങളെ സന്ദർശകർക്ക് അടുത്തറിയുന്നതിനും, വാങ്ങുന്നതിനുമുള്ള അവസരമാണ്.
