രാജ്യത്തെ പള്ളികളിലേക്ക് പ്രാർത്ഥനകൾക്കും, മറ്റു മതപരമായ ചടങ്ങുകൾക്കുമായി വിശ്വാസികൾ പ്രവേശിക്കുന്നതിന് ഫെബ്രുവരി 11, വ്യാഴാഴ്ച്ച മുതൽ താത്‌കാലിക വിലക്കേർപ്പെടുത്താൻ ബഹ്‌റൈൻ തീരുമാനിച്ചു. ഫെബ്രുവരി 11 മുതൽ രണ്ടാഴ്ച്ചത്തേക്കാണ് ഈ വിലക്ക് നിലവിൽ പ്രഖ്യാപിച്ചിട്ടുള്ളത്.
ഫെബ്രുവരി 9-ന് രാത്രിയാണ് ബഹ്‌റൈൻ മിനിസ്ട്രി ഓഫ് ജസ്റ്റിസ്, ഇസ്ലാമിക്ക് അഫയേഴ്‌സ് ആൻഡ് എൻഡോവ്മെന്റ്സ് ഇക്കാര്യം അറിയിച്ചത്. രാജ്യത്തെ സുപ്രീം കൗൺസിൽ ഫോർ ഇസ്ലാമിക്ക് അഫയേഴ്‌സിന്റെയും, നാഷണൽ മെഡിക്കൽ ടാസ്ക്ഫോഴ്‌സിന്റെയും നിർദ്ദേശങ്ങളെ തുടർന്നാണ് പള്ളികൾ രണ്ടാഴ്ച്ചത്തേക്ക് അടച്ചിടാൻ തീരുമാനിച്ചിട്ടുള്ളത്.
രാജ്യത്ത് നിലവിൽ പ്രകടമാകുന്ന COVID-19 രോഗബാധിതരുടെ എണ്ണത്തിലെ വർദ്ധനവ് കണക്കിലെടുത്താണ് ഈ തീരുമാനമെന്ന് മന്ത്രാലയം വ്യക്തമാക്കി. നിലവിലെ സാഹചര്യത്തിൽ പള്ളികളിലെത്തുന്ന പ്രായമായവരുടെ സുരക്ഷിതത്വം കണക്കിലെടുത്താണ് മന്ത്രാലയം താത്‌കാലിക വിലക്കേർപ്പെടുത്തുന്നത്. സ്ഥിതിഗതികൾ നിരീക്ഷിച്ച ശേഷം ആവശ്യമെങ്കിൽ ഈ വിലക്ക് നീട്ടാമെന്നും അധികൃതർ അറിയിച്ചിട്ടുണ്ട്.
വെള്ളിയാഴ്ച്ച പ്രാർത്ഥനകൾ അഹ്‌മദ്‌ അൽ ഫത്തേഹ് ഇസ്ലാമിക്ക് സെന്ററിൽ നിന്ന് തത്സമയം പ്രക്ഷേപണം ചെയ്യുമെന്നും മന്ത്രാലയം അറിയിച്ചു. തിരഞ്ഞെടുക്കപ്പെട്ട ഏതാനം വിശ്വാസികൾക്ക് ഈ ചടങ്ങിൽ നേരിട്ട് പങ്കെടുക്കാൻ അനുമതി നൽകുന്നതാണ്.
