എമിറേറ്റിൽ ഫുഡ് ഡെലിവറി ഓർഡർ ചെയ്യുന്നവർക്ക് ആരോഗ്യ സുരക്ഷ മുൻനിർത്തി പാലിക്കാവുന്ന മാനദണ്ഡങ്ങൾ സംബന്ധിച്ച് ദുബായ് മുനിസിപ്പാലിറ്റി അറിയിപ്പ് നൽകി. 2024 മാർച്ച് 23-നാണ് ദുബായ് മുനിസിപ്പാലിറ്റി ഇത് സംബന്ധിച്ച അറിയിപ്പ് നൽകിയത്.
ഫുഡ് ഡെലിവറി ഓർഡറുകൾ സുരക്ഷിതമാക്കാൻ താഴെ പറയുന്ന മാർഗ്ഗനിർദ്ദേശങ്ങൾ പാലിക്കാൻ പൊതുജനങ്ങളോട് മുനിസിപ്പാലിറ്റി ആഹ്വനം ചെയ്തിട്ടുണ്ട്:
- കഴിയുന്നതും ഏറ്റവും അടുത്തുള്ള റെസ്റ്ററന്റുകളിൽ നിന്ന് ഓർഡർ ചെയ്യാൻ ശ്രമിക്കേണ്ടതാണ്. ഇത് ഭക്ഷണം അര മണിക്കൂറിനുള്ളിൽ ലഭിക്കുന്നതിനുള്ള സാധ്യത വർധിപ്പിക്കുന്നതായും, ഇത്തരം ഭക്ഷണം സുരക്ഷിതവും, പുതിയതും ആയിരിക്കുമെന്നും മുനിസിപ്പാലിറ്റി ചൂണ്ടിക്കാട്ടി.
- ഫുഡ് ഡെലിവറി സ്വീകരിക്കുന്ന അവസരത്തിൽ ചൂടുള്ളതും, തണുത്തതുമായ ഭക്ഷണങ്ങൾ വെവ്വേറെയായാണ് ലഭിക്കുന്നതെന്ന് ഉറപ്പ് വരുത്തേണ്ടതാണ്.
- പാകം ചെയ്തതോ, റെഫ്രിജറേറ്ററിൽ വെച്ച് തണുപ്പിച്ചതോ ആയ ഭക്ഷണ സാധനങ്ങൾ ഡെലിവറി ലഭിച്ച ശേഷം രണ്ട് മണിക്കൂറിലധികം ‘റൂം താപനിലയിൽ’ സൂക്ഷിക്കരുത്. ഇത്തരത്തിൽ ഭക്ഷണം അധിക നേരം സൂക്ഷിക്കുന്നത് അവയിൽ ബാക്ടീരിയ വളരുന്നതിനും, അസുഖങ്ങൾ പിടിപെടുന്നതിനും ഇടയാക്കുന്നതാണ്.
- ഭക്ഷണം അധികസമയത്തേക്ക് റെഫ്രിജറേറ്ററിൽ എടുത്ത് വെച്ച് ഉപയോഗിക്കരുത്, അവ കഴിയുന്നതും ഡെലിവറി ലഭിച്ച അന്ന് തന്നെയോ, പരമാവധി പിറ്റേന്നോ ഉപയോഗിക്കേണ്ടതാണ്.
- ഭക്ഷണം പാഴാക്കുന്നത് ഒഴിവാക്കുന്നതിനായി ഓർഡർ ചെയ്യുന്ന അവസരത്തിൽ ആവശ്യമുള്ള അളവിൽ മാത്രം ഓർഡർ ചെയ്യാൻ ശ്രദ്ധിക്കേണ്ടതാണ്.
