എമിറേറ്റിലെ ടാക്സികളിൽ ഒരേസമയം യാത്ര ചെയ്യാവുന്നവരുടെ എണ്ണത്തിൽ മാറ്റം വരുത്താൻ തീരുമാനിച്ചതായി ദുബായ് റോഡ്സ് ആൻഡ് ട്രാൻസ്‌പോർട്ട് അതോറിറ്റി (RTA) അറിയിച്ചു. പുതിയ തീരുമാനത്തോടെ ദുബായിലെ ടാക്സികളിലെ പിറകിലെ സീറ്റിൽ 2 മുതിർന്ന യാത്രികരോടൊപ്പം 14 വയസ്സുവരെ പ്രായമുള്ള ഒരു കുട്ടിയെക്കൂടി ഉൾപ്പെടുത്തുന്നതിന് അനുമതി നൽകിയിട്ടുണ്ട്.
ഡിസംബർ 26, ശനിയാഴ്ച്ചയാണ് RTA ഇക്കാര്യം അറിയിച്ചത്. 14 വയസ്സിനു താഴെ പ്രായമുള്ള ഒരു കുട്ടിയോടൊപ്പം യാത്ര ചെയ്യുന്ന കുടുംബങ്ങൾക്ക് ഈ തീരുമാനം സഹായകമാകും. COVID-19 വ്യാപന പശ്ചാത്തലത്തിൽ ഏർപ്പെടുത്തിയ ഡ്രൈവറുടെ അരികിലെ സീറ്റ് ഒഴിച്ചിടാനുള്ള തീരുമാനം തുടരുന്നതാണ്.
കൊറോണ വൈറസ് സാഹചര്യത്തിൽ ദുബായിലെ ടാക്സികളിൽ പിൻസീറ്റിൽ പരമാവധി രണ്ട് പേർക്ക് മാത്രമാണ് ഇതുവരെ യാത്രാനുമതി നൽകിയിരുന്നത്. മൂന്ന് നിര സീറ്റുകളുള്ള ടാക്സി വാനുകളിൽ രണ്ട് നിലകളിലായി 2 പേർ വീതം പരമാവധി നാല് യാത്രികർ എന്ന തീരുമാനത്തിൽ മാറ്റങ്ങൾ വരുത്തിയിട്ടില്ല.
