ദോഹ മെട്രോയുടെ സ്റ്റേഷനുകളുമായി ബന്ധപ്പെടുത്തി 300 ബസ് സ്റ്റോപ്പുകളുടെ നിർമ്മാണം പുരോഗമിക്കുന്നതായി ഖത്തർ റെയിൽ അറിയിച്ചു. ദോഹ മെട്രോ സ്റ്റേഷനുകളുടെ പരിസര പ്രദേശങ്ങളിൽ നിന്ന് എളുപ്പത്തിൽ മെട്രോലിങ്ക് ബസ് സേവനങ്ങൾ ഉപയോഗിക്കുന്നതിനു സഹായകമാകുന്ന രീതിയിലാണ് ഈ ബസ് സ്റ്റോപ്പുകൾ നിർമ്മിക്കുന്നതെന്ന് ഖത്തർ റെയിൽ വ്യക്തമാക്കി.
കടുംചുവപ്പ് നിറത്തിൽ അടയാളപ്പെടുത്തിയിട്ടുള്ള ഈ സ്റ്റോപ്പുകൾ സ്ഥിരം യാത്രികർക്ക് സ്റ്റേഷൻ പരിസരങ്ങളിലേക്ക് എത്തുന്നതിനും, അവിടെ നിന്ന് തിരികെ മടങ്ങുന്നതിനും ഏറെ സഹായകമായിരിക്കും. ദോഹ മെട്രോയുടെ ഏതാനം സ്റ്റേഷൻ പരിസരങ്ങളിൽ ഇത്തരം ബസ് സ്റ്റോപ്പുകൾ ഇതിനിടയില്‍ തന്നെ പ്രവർത്തനമാരംഭിച്ചിട്ടുണ്ട്.
ഖത്തറിലെ നാലാം ഘട്ട ഇളവുകളുടെ ഭാഗമായി സെപ്റ്റംബർ 1 മുതൽ ദോഹ മെട്രോ, മെട്രോലിങ്ക് ബസ് സർവീസുകൾ എന്നിവ പുനരാരംഭിച്ചിട്ടുണ്ട്. പരമാവധി ശേഷിയുടെ 30 ശതമാനം യാത്രികരുമായാണ് സെപ്റ്റംബർ 1 മുതൽ ദോഹ മെട്രോ പ്രവർത്തിക്കുന്നത്. തിരഞ്ഞെടുത്ത 17 റൂട്ടുകളിൽ രാവിലെ 6 മുതൽ രാത്രി 11 വരെയാണ് (ഞായർ മുതൽ ബുധൻ വരെ) മെട്രോലിങ്ക് ബസ് സർവീസുകൾ പ്രവർത്തിക്കുന്നത്. വ്യാഴാഴ്ച്ച രാവിലെ 6 മുതൽ രാത്രി 11:59 വരെയും, വെള്ളിയാഴ്ചകളിൽ ഉച്ചയ്ക്ക് 2 മുതൽ രാത്രി 11:50 വരെയുയും മെട്രോലിങ്ക് ബസ് സർവീസുകൾ ലഭ്യമാണ്.
