യു എ ഇ ടൂർ 2021-ന്റെ ഭാഗമായി ഫെബ്രുവരി 26-ന് ദുബായിലെ ഏതാനം റോഡുകളിൽ താത്‌കാലിക ട്രാഫിക് നിയന്ത്രണങ്ങൾ ഏർപ്പെടുത്തും

ഫെബ്രുവരി 26, വെള്ളിയാഴ്ച്ച ഉച്ച മുതൽ വൈകീട്ട് 4.30 വരെ എമിറേറ്റിലെ ഏതാനം റോഡുകളിൽ താത്കാലിക ട്രാഫിക് നിയന്ത്രണങ്ങൾ ഏർപ്പെടുത്തുമെന്ന് ദുബായ് മീഡിയ ഓഫീസ് അറിയിച്ചു. റോഡ് സൈക്ലിംഗ് ടൂർണമെന്റായ യു എ ഇ ടൂർ 2021-ന്റെ ആറാം പാദം ഫെബ്രുവരി 26-ന് ദുബായിൽ വെച്ച് നടക്കുന്ന പശ്ചാത്തലത്തിൽ, സൈക്ലിംഗ് നടക്കുന്ന റോഡുകളിൽ താത്കാലിക ട്രാഫിക് നിയന്ത്രണങ്ങൾ അനുഭവപ്പെടാവുന്നതാണ്.

Rolling closures on select roads this Friday for 165km #Dubai Stage of @UAE_Tour https://t.co/Iyn9KQIapB pic.twitter.com/ltB5UUtwGg

— Dubai Media Office (@DXBMediaOffice) February 24, 2021

ഫെബ്രുവരി 24-നാണ് അധികൃതർ ഇത് സംബന്ധിച്ച അറിയിപ്പ് നൽകിയത്. ദുബായിൽ വെച്ച് നടക്കുന്ന യു എ ഇ ടൂർ 2021-ന്റെ ആറാം പാദം 165 കിലോമീറ്റർ ദൈർഘ്യമുള്ളതാണ്. റാലിയിൽ പങ്കെടുക്കുന്ന സൈക്കിളോട്ടക്കാർ ഓരോ മേഖലയിലൂടെയും കടന്ന് പോകുന്നതിനനുസരിച്ച് റോഡുകൾ തുറന്ന് കൊടുക്കുന്നതാണ്.

യു എ ഇ ടൂർ 2021-ന്റെ ആറാം പാദം ദെയ്‌റ ഐലൻഡിൽ നിന്ന് ഉച്ചയ്ക്ക് 12.35-ന് ആരംഭിക്കുന്നതാണ്. വൈകീട്ട് 4.30-ന് പാം ജുമേയ്‌റയിൽ മത്സരം അവസാനിക്കുന്നതാണ്. ദുബായിലെ പ്രധാനപ്പെട്ട സാംസ്‌കാരിക, ചരിത്ര മേഖലകളിലൂടെയാണ് റാലിയിൽ പങ്കെടുക്കുന്ന സൈക്കിളോട്ടക്കാർ കടന്ന് പോകുന്നത്. താഴെ പറയുന്ന സമയക്രമത്തിലാണ് ഫെബ്രുവരി 26-ന് ദുബായിലെ റോഡുകളിൽ ട്രാഫിക് നിയന്ത്രണങ്ങൾ ഏർപ്പെടുത്തുന്നത്.

• ഉച്ചയ്ക്ക് 12 മണിമുതൽ നിയന്ത്രണങ്ങൾ ആരംഭിക്കുന്നതാണ്.
• ദെയ്‌റയിലെ അൽ ഖലീജ് സ്ട്രീറ്റ് ഉച്ചയ്ക്ക് 12:30 മുതൽ 12:55 വരെ ഭാഗികമായി അടയ്ക്കുന്നതാണ്.
• ബനിയാസ് സ്ട്രീറ്റിൽ നിന്ന് ആരംഭിച്ച് റിബാത്ത് സ്ട്രീറ്റിലൂടെ റാസ് അൽ ഖോർ റോഡിലേക്ക് പോകുന്ന റോഡ് 12:50 മുതൽ 1:15 വരെ ഭാഗികമായി അടയ്ക്കുന്നതാണ്.
• ദുബായ്-അൽ ഐൻ റോഡ്, മെയ്ദാൻ മുതൽ അൽ ഹദിഖ സ്ട്രീറ്റ് വരെയുള്ള മേഖലയിൽ 1:10 തൊട്ട് 1:25 വരെ റോഡ് ഭാഗികമായി അടച്ചിടുന്നതാണ്.
• 1:20-നും 1:40-നും ഇടയിൽ അൽ വാസൽ സ്ട്രീറ്റ്, അൽ തന്യ സ്ട്രീറ്റ്, ജുമേയ്‌റ സ്ട്രീറ്റ് എന്നിവിടങ്ങളിൽ ട്രാഫിക് നിയന്ത്രണം ഉണ്ടായിരിക്കും.
• ജബൽ അലി ഭാഗത്തേക്ക് നയിക്കുന്ന കിംഗ് സൽമാൻ ബിൻ അബ്ദുൽഅസീസ് അൽ സൗദ് സ്ട്രീറ്റ് 1:35-നും, 2:05-നും ഇടയിൽ ഭാഗികമായി അടച്ചിടുന്നതാണ്.
• അൽ അസ്യാൽ സ്ട്രീറ്റ്, ഖിർന് അൽ സബ്കാ റോഡ്, അൽ ഖൈൽ 1 ഹെസ സ്ട്രീറ്റ്, ഷെയ്ഖ് സയ്ദ് ബിൻ ഹംദാൻ അൽ നഹ്യാൻ സ്ട്രീറ്റ് എന്നിവിടങ്ങളിൽ 2-നും 2:40-നും ഇടയിൽ ട്രാഫിക് നിയന്ത്രണം ഉണ്ടായിരിക്കും.
• അൽ ഖുദ്ര റോഡിനും സെഹ്‌ അൽ സലാം സ്ട്രീറ്റിനും ഇടയിലുള്ള മേഖല 2:35 മുതൽ 3:55 വരെ ഭാഗികമായി അടച്ചിടുന്നതാണ്. ഇവിടെ നിന്ന് സൈക്കിളോട്ടക്കാർ അൽ ഖുദ്ര റോഡിലേക്ക് തിരികെ മടങ്ങുകയും തുടർന്ന് ഹെസ സ്ട്രീറ്റിലൂടെ ഉം സുഖേയിം ഭാഗത്തേക്ക് തിരിക്കുകയും ചെയ്യുന്നതിനാൽ ഈ മേഖലയിൽ 3:50-നും, 4:20-നും ഇടയിൽ ട്രാഫിക് നിയന്ത്രണം ഉണ്ടായിരിക്കും.
• പാം ജുമേയ്‌റ, അറ്റ്ലാന്റിസ് പാം ഹോട്ടൽ മേഖലയിൽ 4:15 മുതൽ 4:35 വരെ ട്രാഫിക് നിയന്ത്രണം ഉണ്ടായിരിക്കുന്നതാണ്.

Cover Photo: @uae_tour