യു എ ഇയിൽ പുതിയ അധ്യയന വർഷം ആരംഭിക്കുന്ന 2024 ആഗസ്റ്റ് 26-ന് ‘അപകട രഹിത ദിനമായി ആചരിക്കുമെന്ന് ആഭ്യന്തര മന്ത്രാലയം അറിയിച്ചു. എമിറേറ്റ്സ് ന്യൂസ് ഏജൻസിയാണ് ഇക്കാര്യം റിപ്പോർട്ട് ചെയ്തത്.
ഇതിന്റെ ഭാഗമായി ഓഗസ്റ്റ് 26-ന് ‘അപകട രഹിത ദിനം’ എന്ന പേരിൽ ഒരു ദേശീയ ബോധവൽക്കരണ കാമ്പയിൻ നടത്തുന്നതാണ്. യു എ ഇ ആഭ്യന്തര മന്ത്രാലയത്തിന് കീഴിലുള്ള ഫെഡറൽ ട്രാഫിക് കൗൺസിൽ, ജനറൽ കമാൻഡ് ഓഫ് പോലീസ് എന്നിവരാണ് ഈ കാമ്പെയിൻ സംഘടിപ്പിക്കുന്നത്.
സ്‌കൂളിലെ ആദ്യ ദിനം ട്രാഫിക് അപകടങ്ങൾ ഉണ്ടാകുന്നില്ലെന്ന് ഉറപ്പാക്കാനാണ് ഈ കാമ്പയിൻ ലക്ഷ്യമിടുന്നത്. ഈ ബോധവത്കരണ പരിപാടിയിൽ എല്ലാവരുടെയും പങ്കാളിത്തം പ്രോത്സാഹിപ്പിക്കുന്നതിനായി, “അപകട രഹിത ദിനം” കാമ്പെയ്‌നിൽ പ്രതിജ്ഞാബദ്ധരായവർക്ക് നാല് ബ്ലാക്ക് ട്രാഫിക് പോയിൻ്റുകളുടെ കുറവ് പ്രയോജനപ്പെടുത്തുന്നതിനും അവസരം ലഭിക്കുന്നതാണ്.
ഈ പ്രചാരണപരിപാടിയിൽ പങ്കെടുത്ത് കൊണ്ട് ട്രാഫിക് ബ്ലാക്ക് പോയിന്റുകളിൽ ഇളവ് നേടാൻ ആഗ്രഹിക്കുന്ന വ്യക്തികൾക്ക് യു എ ഇ ആഭ്യന്തര മന്ത്രാലയത്തിന്റെ ഔദ്യോഗിക വെബ്‌സൈറ്റ് സന്ദർശിച്ച് സ്കൂൾ അധ്യയന വർഷത്തിന്റെ ആദ്യ ദിവസമായ ആഗസ്റ്റ് 26-ന് ഞാൻ ട്രാഫിക് ലംഘനങ്ങളോ അപകടങ്ങളോ ഉണ്ടാക്കില്ല എന്ന പ്രതിജ്ഞയിൽ ഒപ്പിടാവുന്നതാണ്. തുടർന്ന് ആഗസ്റ്റ് 26-ന് ട്രാഫിക് അപകടങ്ങളോ, നിയമലംഘനങ്ങളോ നടത്താത്ത ഡ്രൈവർമാർക്ക് തങ്ങളുടെ ലൈസൻസിൽ നാല് ബ്ലാക്ക്പോയന്‍റുകൾ കുറക്കാൻ അവസരം ലഭിക്കുന്നതാണ്.
വർഷം മുഴുവനും ട്രാഫിക് സുരക്ഷ പാലിക്കുന്നത് പ്രോത്സാഹിപ്പിക്കുന്നതിനുള്ള പ്രോത്സാഹനമെന്ന നിലയിൽ, ഓഗസ്റ്റ് 26-ന് ശേഷം രണ്ടാഴ്ചയ്ക്ക് ശേഷം ഈ കിഴിവ് ബാധകമാകുന്നതാണ്. പ്രധാന സുരക്ഷാ സമ്പ്രദായങ്ങളെക്കുറിച്ച് വാഹനമോടിക്കുന്നവരെ ബോധവത്കരിക്കുന്നതിലൂടെ ഉത്തരവാദിത്തമുള്ള ഡ്രൈവിംഗ് സംസ്കാരം പ്രോത്സാഹിപ്പിക്കാനാണ് ഈ കാമ്പയിൻ ശ്രമിക്കുന്നതെന്ന് ഫെഡറൽ ട്രാഫിക് കൗൺസിൽ ചെയർമാൻ ബ്രിഗേഡിയർ എഞ്ചിനീയർ ഹുസൈൻ അഹമ്മദ് അൽ ഹരിതി വിശദീകരിച്ചു.
വാഹന സുരക്ഷ ഉറപ്പാക്കൽ, സ്‌കൂളുകൾക്ക് സമീപം വേഗപരിധി പാലിക്കൽ, മൊബൈൽ ഫോണുകൾ പോലെയുള്ള അശ്രദ്ധ ഡ്രൈവിംഗ് ശീലങ്ങൾ ഉണ്ടാക്കുന്ന ഘടകങ്ങൾ ഒഴിവാക്കൽ, ട്രാഫിക് പാത പിന്തുടരൽ, സുരക്ഷിത അകലം പാലിക്കൽ, കാൽനടയാത്രക്കാർക്ക് മുൻഗണന നൽകൽ, എമർജൻസി വാഹനങ്ങൾക്ക് വഴിയൊരുക്കൽ തുടങ്ങിയ സുരക്ഷാ ശീലങ്ങൾ ഈ ബോധവത്കരണ കാമ്പെയിൻ പ്രത്യേകം എടുത്ത് കാട്ടുന്നു.
WAM
