എമിറേറ്റിലേക്കുള്ള പ്രവേശന കവാടങ്ങളിലെ പോലീസ് ചെക്ക്പോയിന്റുകളിൽ നിർത്തുന്ന വാഹനങ്ങളിലെ യാത്രികരോട് മാസ്കുകൾ ധരിക്കാൻ അബുദാബി പോലീസ് നിർദ്ദേശം നൽകി. ഫെബ്രുവരി 16, ചൊവ്വാഴ്ച്ചയാണ് അബുദാബി പോലീസ് ഇത് സംബന്ധിച്ച അറിയിപ്പ് നൽകിയത്.
ചെക്ക്പോയിന്റുകളിലെത്തുന്ന വാഹനങ്ങളിലെ ഡ്രൈവർമാരും, യാത്രികരും മാസ്കുകൾ ധരിക്കേണ്ടതാണെന്ന് പോലീസ് വ്യക്തമാക്കി. COVID-19 സുരക്ഷാ നിർദ്ദേശങ്ങളിലെ വീഴ്ച്ചകൾക്കുള്ള പിഴ ശിക്ഷകൾ ഒഴിവാക്കുന്നതിനായി മാസ്കുകൾ നിർബന്ധമായി ധരിക്കുന്നതോടൊപ്പം, അവ കൃത്യമായും, ശരിയായ രീതിയിലുമാണ് ധരിക്കുന്നതെന്ന് ഉറപ്പാക്കാനും പോലീസ് ആവശ്യപ്പെട്ടിട്ടുണ്ട്.
എമിറേറ്റിലേക്ക് പ്രവേശിക്കുന്ന യാത്രികരുടെ COVID-19 ടെസ്റ്റ് റിസൾട്ട് പരിശോധിക്കുന്നതിനായി അബുദാബി പോലീസ് എമിറേറ്റിലെ പ്രവേശന കവാടങ്ങളിൽ ചെക്ക്പോയിന്റുകൾ ഏർപ്പെടുത്തിയിട്ടുണ്ട്. ഇത്തരം പോലീസ് ചെക്ക്പോയിന്റുകളിൽ ഏർപ്പെടുത്തിയിട്ടുള്ള സുരക്ഷാ നിബന്ധനകൾ കർശനമായി പാലിക്കാൻ വാഹനങ്ങൾ ഉപയോഗിക്കുന്നവർക്ക് അബുദാബി പോലീസ് നേരത്തെ നിർദ്ദേശം നൽകിയിരുന്നു.
