എമിറേറ്റിലെ പൊതുഗതാഗത സംവിധാനങ്ങളുടെ ഭാഗമായുള്ള ബസുകളിൽ അജ്മാൻ ട്രാൻസ്പോർട്ട് അതോറിറ്റി ഓപ്പൺ, കോൺടാക്റ്റ്‌ലെസ് പേയ്‌മെന്റ് സംവിധാനം അവതരിപ്പിച്ചു. ഈ നൂതന സാങ്കേതികവിദ്യ നടപ്പിലാക്കുന്ന യു എ ഇയിലെ ആദ്യത്തെ പൊതുഗതാഗത സ്ഥാപനമാണിത്.
എമിറേറ്റ്സ് ന്യൂസ് ഏജൻസിയാണ് ഇക്കാര്യം റിപ്പോർട്ട് ചെയ്തത്. ഈ സംവിധാനം പ്രയോജനപ്പെടുത്തിക്കൊണ്ട് യാത്രികർക്ക് ബാങ്ക് കാർഡുകൾ, ആപ്പിൾ പേ, ഗൂഗിൾ പേ പോലുള്ള ഡിജിറ്റൽ വാലറ്റുകൾ, സ്മാർട്ട് വാച്ചുകൾ പോലുള്ള ധരിക്കാവുന്ന ഉപകരണങ്ങൾ എന്നിവ ഉപയോഗിച്ച് സുരക്ഷിതമായി പണമടയ്ക്കാൻ സാധിക്കുന്നതാണ്.
സ്മാർട്ട് പേയ്‌മെന്റ് ഉപകരണങ്ങൾ ഇതിനകം മുഴുവൻ പബ്ലിക് ബസ് ഫ്ലീറ്റിലും ഇൻസ്റ്റാൾ ചെയ്തിട്ടുണ്ട്. ഇന്റേണൽ റൂട്ടുകളിൽ ഈ സേവനം നിലവിൽ സജീവമാക്കിയിട്ടുണ്ട്.
സമീപഭാവിയിൽ ഇത് ബാഹ്യ റൂട്ടുകളിലേക്ക് വ്യാപിപ്പിക്കാനും അതോറിറ്റി പദ്ധതിയിടുന്നുണ്ട്.
ഇതിന് പുറമെ, “മസാർ ട്രാവൽ” ആപ്പ് അപ്‌ഗ്രേഡ് ചെയ്തതായും അതോറിറ്റി അറിയിച്ചിട്ടുണ്ട്. ഈ ആപ്പ് ഉപയോഗിച്ച് കൊണ്ട് യാത്രക്കാർക്ക് യാത്രകൾ ആസൂത്രണം ചെയ്യാനും, തത്സമയം ബസുകൾ ട്രാക്ക് ചെയ്യാനും, അവരുടെ ബാങ്ക് കാർഡുകൾ ലിങ്ക് ചെയ്യാനും, യാത്രാ ചരിത്രം കാണാനും സാധിക്കുന്നതാണ്.
WAM
