ലോകത്തിലെ ഏറ്റവും ഉയരം കൂടിയ ഒബ്‌സർവേഷൻ വീലായ ഐൻ ദുബായ് 2021 ഒക്ടോബർ 21 മുതൽ സന്ദർശകർക്കായി തുറന്ന് കൊടുക്കും. ദുബായ് ഹോൾഡിംഗാണ് ലോകത്തിന്റെ ഭാവനയെ പിടിച്ചടക്കിയ ആത്യന്തിക ആഘോഷ കേന്ദ്രമായ ഐൻ ദുബായ് നിർമ്മിച്ചിരിക്കുന്നത്.
എയർകണ്ടീഷൻ ചെയ്ത ഇൻഡോർ ക്യാബിനുകളിൽ നിന്നും ദുബായിലെ ഐക്കണിക് ലാൻഡ്‌മാർക്കുകളുടെ അതുല്യമായ കാഴ്ച്ചകൾ വാഗ്ദാനം ചെയ്യുന്ന ഐൻ ദുബായ് ലോകത്തെ ഏറ്റവും ഉയരം കൂടിയതും, വലിയതുമായ നിരീക്ഷണ യന്ത്ര ഊഞ്ഞാലാണ്. https://www.aindubai.com/en/ എന്ന വിലാസത്തിൽ നിന്ന് 21 ഒക്ടോബർ മുതൽ ഐൻ ദുബായ് സന്ദർശിക്കുന്നതിനുള്ള ടിക്കറ്റുകൾ മുൻ‌കൂർ ബുക്ക് ചെയ്യാവുന്നതാണ്.
സന്ദർശകർക്ക് നിരീക്ഷണ ക്യാബിനുകൾ, സോഷ്യൽ ക്യാബിനുകൾ, സ്വകാര്യ ക്യാബിനുകൾ എന്നിങ്ങനെ മൂന്ന് തരം അനുഭവങ്ങൾ തിരഞ്ഞെടുക്കാവുന്നതാണ്. നിരീക്ഷണ ക്യാബിനുകളിൽ നിന്ന് സന്ദർശകർക്ക് ലോകത്തിലെ ഏറ്റവും പ്രശസ്തമായ നഗരങ്ങളിലൊന്നായ ദുബായിയുടെ ഇതുവരെ കണ്ടിട്ടില്ലാത്ത 360 ഡിഗ്രി കാഴ്ചകൾ ആസ്വദിക്കാവുന്നതാണ്. സോഷ്യൽ ക്യാബിനുകളിൽ പാനീയങ്ങൾ ഉൾപ്പടെയുള്ള സേവനങ്ങൾ ഉൾപ്പെടുത്തി കൂടുതൽ മികച്ച അനുഭവങ്ങളാണ് സന്ദർശകരെ കാത്തിരിക്കുന്നത്. ജന്മദിനങ്ങൾ, വിവാഹനിശ്ചയങ്ങൾ, വിവാഹങ്ങൾ, ബിസിനസ്സ് ചടങ്ങുകൾ മുതലായ ആഘോഷവേളകളിൽ സ്വകാര്യ ക്യാബിനുകൾ തിരഞ്ഞെടുക്കാവുന്നതാണ്.
WAM
