ദുബായ് ക്രീക്കിന് കുറുകെ എട്ട് വരിയുള്ള ഒരു പുതിയ പാലം നിർമ്മിക്കുന്നതിനുള്ള കരാർ അനുവദിച്ചതായി റോഡ്സ് ആൻഡ് ട്രാൻസ്‌പോർട് അതോറിറ്റി (RTA) അറിയിച്ചു. 2025 ഏപ്രിൽ 6-നാണ് RTA ഇക്കാര്യം അറിയിച്ചത്.
#RTA has awarded the contract for constructing direct access points to Dubai Islands from Bur Dubai side. This project aims to support ongoing development, address the demands of urban and demographic growth, improve traffic flow, and facilitate the movement of residents and… pic.twitter.com/t78wEKpoAY
— RTA (@rta_dubai) April 6, 2025
ദുബായ് ഐലൻഡ്സിനെ ബർ ദുബായിയുമായി ബന്ധിപ്പിക്കുന്നത് ലക്ഷ്യമിട്ടാണിത്. ഈ പുതിയ പാലം ബർ ദുബായ് മേഖലയിലെ ഗതാഗതത്തിരക്ക് കുറയ്ക്കുന്നതിന് സഹായകമാകുന്നതാണ്.
ഓരോ വശത്തേക്കും നാല് വരികൾ വീതമുള്ള ഈ പാലത്തിന്റെ ആകെ നീളം 1,425 മീറ്ററാണ്. ഏതാണ്ട് 786 മില്യൺ ദിർഹമാണ് ഈ പദ്ധതിയ്ക്കായി വകയിരുത്തിയിരിക്കുന്നത്.
ഇൻഫിനിറ്റി പാലത്തെ പോർട്ട് റഷീദ് ഡവലപ്മെന്റ് ഏരിയയുമായി ബന്ധിപ്പിക്കുന്ന രീതിയിലാണ് ഈ പാലം ദുബായ് ക്രീക്കിന് കുറുകെ നിർമ്മിക്കുന്നത്. മണിക്കൂറിൽ ഇരുവശത്തേക്കും 16000 വാഹനങ്ങൾക്ക് കടന്ന് പോകാനാകുന്ന രീതിയിലാണ് ഈ പാലത്തിന്റെ നിർമ്മാണം.
ദുബായ് ക്രീക്കിന്റെ പ്രതലത്തിൽ നിന്ന് 18.5 മീറ്റർ ഉയർന്ന് നിൽക്കുന്ന രീതിയിലാണ് ഈ പാലം നിർമ്മിക്കുന്നത്. ആകെ 75 മീറ്ററാണ് ഈ പാലത്തിന്റെ വീതി.
കാൽനടക്കാർക്കും, സൈക്കിൾ യാത്രികർക്കുമായുള്ള പ്രത്യേക പാതകൾ ഈ പാലത്തിൽ ഉൾപ്പെടുത്തുന്നതാണ്. ദുബായ് ഐലൻഡ്സ്, ബർ ദുബായ് എന്നീ ഭാഗങ്ങളിൽ നിലവിലുള്ള റോഡുകളുമായി ഈ പാലത്തെ ബന്ധിപ്പിക്കുന്നതിനുള്ള ആകെ 2000 മീറ്റർ നീളത്തിലുള്ള പുതിയ റോഡുകളും ഈ പദ്ധതിയിൽ ഉൾപ്പെടുത്തി നിർമ്മിക്കുന്നതാണ്.
Cover Image: Dubai Media Office.
