റിയാദ് സീസൺ 2022-ന്റെ ഭാഗമായുള്ള വിനോദമേഖലയായ ലിറ്റിൽ റിയാദ് സോൺ പൊതുജനങ്ങൾക്ക് തുറന്ന് കൊടുത്തു. 2022 നവംബർ 26, ശനിയാഴ്ചയാണ് ലിറ്റിൽ റിയാദ് സോൺ തുറന്ന് കൊടുത്തത്.
തത്സമയമുള്ള സംഗീത പരിപാടികൾ, യോഗ സെഷനുകൾ, കരകൗശല പരിശീലനകളരികൾ എന്നിവ ഉൾപ്പടെ വിവിധ പരിപാടികൾ ലിറ്റിൽ റിയാദ് സോണിൽ ഉൾപ്പെടുത്തിയിട്ടുണ്ട്. ഡിപ്ലോമാറ്റിക് ക്വാർട്ടറിലെ ദി ഗ്രോവ്സ് സോണിനരികിലായാണ് ലിറ്റിൽ റിയാദ് വിനോദ മേഖല ഒരുക്കിയിരിക്കുന്നത്.
പാർക്കേഴ്‌സ്, ഡാനിഷ് ജ്യൂസ് ബാർ/ കോഫീ ഷോപ്പായ ജോ & ദി ജ്യൂസ് എന്നിവ ഉൾപ്പടെ ലിറ്റിൽ റിയാദിൽ നിരവധി ഭക്ഷണശാലകൾ ഒരുക്കിയിട്ടുണ്ട്. ദിനവും രാവിലെ 7 മുതൽ രാത്രി 1 മണിവരെ ലിറ്റിൽ റിയാദ് മേഖലയിലേക്ക് പ്രവേശനം അനുവദിക്കുന്നതാണ്.
ഈ വർഷത്തെ റിയാദ് സീസണിന്റെ ഭാഗമായുള്ള ഏറ്റവും വലിയ വിനോദ മേഖലയായ ബുലവാർഡ് വേൾഡ് സൗദി ജനറൽ എന്റെർറ്റൈന്മെന്റ് അതോറിറ്റി ചെയർമാൻ തുർക്കി അൽ ഷെയ്ഖ് 2022 നവംബർ 22-ന് ഉദ്ഘാടനം ചെയ്തിരുന്നു.
1.2 കിലോമീറ്റർ നീളമുള്ള ബുലവാർഡ് വേൾഡ് സോണിൽ പത്ത് പവലിയനുകൾ ഉൾപ്പെടുത്തിയിട്ടുണ്ട്.
ഇന്ത്യ ഉൾപ്പടെ പത്ത് രാജ്യങ്ങളിൽ നിന്നുള്ള വൈവിധ്യമാർന്ന അനുഭവങ്ങൾ സന്ദർശകർക്ക് മുന്നിൽ അവതരിപ്പിക്കുന്ന രീതിയിലാണ് ബുലവാർഡ് വേൾഡ് ഒരുക്കിയിരിക്കുന്നത്.
2022 ഒക്ടോബർ 21-നാണ് പശ്ചിമേഷ്യന്‍ പ്രദേശങ്ങളിൽ സംഘടിപ്പിക്കപ്പെടുന്ന ഏറ്റവും വലിയ വിനോദ പരിപാടിയായ റിയാദ് സീസണിന്റെ മൂന്നാമത് പതിപ്പ് ആരംഭിച്ചത്.
ഉദ്ഘാടന ചടങ്ങിന്റെ ഭാഗമായി ഡ്രോണുകൾ ഉപയോഗിച്ച് കൊണ്ട് നടത്തിയ വെടിക്കെട്ട് ഗിന്നസ് ബുക്ക് ഓഫ് റെക്കോർഡ്സിൽ ഇടം നേടിയിരുന്നു.
2022-ലെ റിയാദ് സീസണിൽ 15 വ്യത്യസ്ത വിനോദ മേഖലകളാണ് ഒരുക്കിയിരിക്കുന്നത്. ഓരോ വിനോദമേഖലയും സന്ദർശകർക്ക് വ്യത്യസ്തമായ അനുഭവമൊരുക്കുന്നു.
Cover Image: Boulevard World @ Riyadh Season. Source:@RiyadhSeason
