2022 സെപ്റ്റംബർ 9, വെള്ളിയാഴ്ച നടന്ന ലുസൈൽ സൂപ്പർ കപ്പ് മത്സരത്തിന്റെ ഭാഗമായി ലുസൈൽ QNB മെട്രോ സ്റ്റേഷനിൽ നിന്ന് 97000-ൽ പരം യാത്രികർ മെട്രോ സേവനങ്ങൾ ഉപയോഗപ്പെടുത്തിയതായി ഖത്തർ റെയിൽ അറിയിച്ചു. 2022 സെപ്റ്റംബർ 10-നാണ് ഖത്തർ റെയിൽ ഇക്കാര്യം അറിയിച്ചത്.
ദോഹ മെട്രോയുടെ ഭാഗമായിട്ടുള്ള സ്റ്റേഷനുകളിൽ ഒരു ദിവസം എത്തുന്ന ഏറ്റവും ഉയർന്ന യാത്രികരുടെ എണ്ണം എന്ന റെക്കോർഡ് ഇതോടെ ലുസൈൽ QNB മെട്രോ സ്റ്റേഷൻ കരസ്ഥമാക്കി. സെപ്റ്റംബർ 9-ന് ദോഹ മെട്രോ ആൻഡ് ലുസൈൽ ട്രാം 1 pm മുതൽ പിറ്റേന്ന് പുലർച്ചെ 3 മണിവരെ പ്രവർത്തിപ്പിച്ചിരുന്നു.
ലുസൈൽ സൂപ്പർ കപ്പ് മത്സരത്തിൽ സൗദി അറേബ്യയിൽ നിന്നുള്ള അൽ ഹിലാൽ ക്ലബ് ഈജിപ്തിൽ നിന്നുള്ള സമലെക് ക്ലബ് എന്നിവർ ഏറ്റുമുട്ടിയിരുന്നു. ഈ മത്സരത്തിൽ പെനാൽറ്റി ഷൂട്ട്ഔട്ടിൽ അൽ ഹിലാൽ 4-1-ന് വിജയിച്ചിരുന്നു.
