യു എ ഇയിൽ നിന്ന് ഇന്ത്യയിലേക്ക് മടങ്ങുന്നതിനായി എംബസിയിൽ രജിസ്റ്റർ ചെയ്ത പ്രവാസികൾക്ക്, വന്ദേ ഭാരത് മിഷൻ നാലാം ഘട്ടത്തിലെ വിമാനങ്ങളിലെ ടിക്കറ്റുകൾ ഇന്ന് (ജൂൺ 28) രാത്രി 7 മുതൽ നേരിട്ട് എയർ ഇന്ത്യ എക്സ്പ്രസ്സ് വഴി ബുക്ക് ചെയ്യാമെന്ന്, യു എ ഇയിലെ ഇന്ത്യൻ എംബസി അറിയിച്ചു.
ജൂലൈ 3 മുതൽ ജൂലൈ 14 വരെയുള്ള വിമാന സർവീസുകളിലാണ് നേരിട്ട് ബുക്കിങ്ങ് അനുവദിച്ചിട്ടുള്ളത്. എംബസിയിൽ രജിസ്റ്റർ ചെയ്തിട്ടുള്ളവർക്കാണ് ഈ സേവനം അനുവദിക്കുന്നത് എന്നും, ആദ്യം ബുക്ക് ചെയ്യുന്നവർക്കായിരിക്കും ടിക്കറ്റ് ലഭ്യമാകുക എന്നും എംബസി അറിയിച്ചിട്ടുണ്ട്.
https://www.airindiaexpress.in എന്ന വിലാസത്തിലൂടെ എയർ ഇന്ത്യ എക്സ്പ്രസ്സ് വഴി ബുക്കിംഗ് ചെയ്യാവുന്നതാണ്. അല്ലെങ്കിൽ അബുദാബി, അൽ ഐൻ, ദുബായ്, ഷാർജ, റാസ് അൽ ഖൈമ, ഫുജൈറ, അജ്‌മാൻ എന്നിവിടങ്ങളിലെ എയർ ഇന്ത്യ എക്സ്പ്രസ് ബുക്കിങ്ങ് കേന്ദ്രങ്ങൾ വഴി ടിക്കറ്റുകൾ എടുക്കാവുന്നതാണ്.
