എക്സ്പോ സിറ്റി ദുബായിൽ നടന്ന് കൊണ്ടിരിക്കുന്ന ‘വിന്റർ സിറ്റി’ ശീതകാല ആഘോഷ പരിപാടികൾ 2023 ജനുവരി 12 വരെ നീട്ടാൻ തീരുമാനിച്ചതായി അധികൃതർ അറിയിച്ചു. 2023 ജനുവരി 6-നാണ് എക്സ്പോ സിറ്റി ദുബായ് അധികൃതർ ഇക്കാര്യം അറിയിച്ചത്.
വിന്റർ സിറ്റി ആഘോഷ പരിപാടികൾ 2023 ജനുവരി 8-ന് അവസാനിക്കുമെന്നാണ് നേരത്തെ അറിയിച്ചിരുന്നത്. എന്നാൽ ഈ പരിപാടിയിൽ പങ്കെടുക്കുന്നതിനുള്ള ജനങ്ങളുടെ ഭാഗത്ത് നിന്നുള്ള തിരക്ക് കണക്കിലെടുത്ത് വിന്റർ സിറ്റി ആഘോഷ പരിപാടികൾ ജനുവരി 12 വരെ നീട്ടാൻ തീരുമാനിക്കുകയായിരുന്നു.
2023 ജനുവരി 9 മുതൽ ജനുവരി 12 വരെ ദിനവും വൈകീട്ട് 3 മണിമുതൽ രാത്രി 11 മണിവരെയാണ് ‘വിന്റർ സിറ്റി’ ആഘോഷങ്ങൾ നടക്കുന്നത്. ഇതിന്റെ ഭാഗമായി എക്സ്പോ സിറ്റിയിലെ മൊബിലിറ്റി ഡിസ്ട്രിക്ട്, വാട്ടർ ഫീച്ചർ, അൽ വാസൽ പ്ലാസ എന്നിവ ശൈത്യകാലത്തെ ഓർമ്മപ്പെടുത്തുന്ന മായികക്കാഴ്ചകളുമായി സന്ദർശകരെ സ്വീകരിക്കുന്നതാണ്.
ആശ്ചര്യജനകമായ സിപ്-ലൈൻ അനുഭവങ്ങൾ, ക്രിസ്മസ് മാർക്കറ്റ്, ഭീമൻ ക്രിസ്മസ് ട്രീ മുതലായ ആകർഷണങ്ങൾ വിന്റർ സിറ്റിയിലെത്തുന്ന സന്ദർശകർക്ക് ആസ്വദിക്കാവുന്നതാണ്.
പൈൻ മരങ്ങൾ നിറഞ്ഞ പരമ്പരാഗത രീതിയിലുള്ള ക്രിസ്മസ് ചന്ത, വിനോദമത്സരങ്ങൾ, കുട്ടികൾക്ക് സാന്താ ക്ലോസിന് കത്തെഴുതാൻ അവസരം നൽകുന്ന ലെറ്റർ-റ്റു-സാന്ത സ്റ്റേഷൻ, അൽ വാസൽ പ്ലാസയിൽ നടക്കുന്ന ക്രിസ്മസ് പ്രൊജക്ഷൻ ഷോ മുതലായവ വിന്റർ സിറ്റിയിലെ മറ്റു ആകർഷണങ്ങളാണ്.
2022 നവംബർ 23-നാണ് ‘വിന്റർ സിറ്റി’ ശീതകാല ആഘോഷ പരിപാടികൾ ആരംഭിച്ചത്.
WAM.
