തൊഴിലിടങ്ങളിൽ വേനൽ ചൂടിൽ നിന്ന് തൊഴിലാളികൾക്ക് സംരക്ഷണം ഉറപ്പ് വരുത്തുന്നതിനുള്ള നടപടികൾ, ബോധവത്കരണ പ്രവർത്തനങ്ങൾ എന്നിവ തൊഴിൽ മന്ത്രാലയത്തിന്റെ നേതൃത്വത്തിൽ ആരംഭിച്ചതായി ഖത്തർ ന്യൂസ് ഏജൻസി റിപ്പോർട്ട് ചെയ്തു. 2022 മെയ് 25-നാണ് ഖത്തർ ന്യൂസ് ഏജൻസി ഇക്കാര്യം റിപ്പോർട്ട് ചെയ്തത്.
രാജ്യത്തെ തുറന്ന ഇടങ്ങളിലും, സൂര്യതപം ഏൽക്കാനിടയുള്ള പുറം തൊഴിലിടങ്ങളിലും തൊഴിലെടുക്കുന്നവർക്ക് സംരക്ഷണം നൽകുന്നതിനായി, ‘2021/ 17’ എന്ന മന്ത്രിതല തീരുമാനത്തിന്റെ ഭാഗമായി, 2022 ജൂൺ 1 മുതൽ 2022 സെപ്റ്റംബർ 15 വരെയുള്ള കാലയളവിൽ മന്ത്രാലയം പ്രത്യേക മുൻകരുതൽ നടപടികൾ നടപ്പിലാക്കുന്നതാണ്. ഇതിന്റെ ഭാഗമായി തുറന്ന ഇടങ്ങളിൽ തൊഴിലെടുക്കുന്നവർക്ക് വേനൽ ചൂടിൽ സംഭവിക്കാവുന്ന അപകടങ്ങളെക്കുറിച്ച് അവബോധം നൽകുന്നതിനായി മന്ത്രാലയം പ്രത്യേക പ്രചാരണ പരിപാടികൾ സംഘടിപ്പിക്കുന്നതാണ്.
2022 ജൂൺ 1 മുതൽ 2022 സെപ്റ്റംബർ 15 വരെയുള്ള കാലയളവിൽ രാജ്യത്തെ തുറന്ന ഇടങ്ങളിലും, സൂര്യതപം ഏൽക്കാനിടയുള്ള പുറം തൊഴിലിടങ്ങളിലും നിർബന്ധിത മദ്ധ്യാഹ്ന ഇടവേള നടപ്പിലാക്കുന്നതാണ്. ഈ കാലയളവിൽ തുറന്ന ഇടങ്ങളിലും, സൂര്യതപം ഏൽക്കാനിടയുള്ള പുറം തൊഴിലിടങ്ങളിലും രാവിലെ 10 മുതൽ വൈകീട്ട് 3.30 വരെ പ്രവർത്തനങ്ങൾ അനുവദിക്കുന്നതല്ല. വേനൽച്ചൂടിന്റെ കാഠിന്യം തടയുന്നതിന് ആവശ്യമായ നടപടികൾ സ്വീകരിക്കാത്ത അടച്ചിട്ട തൊഴിലിടങ്ങൾക്കും ഈ നിയന്ത്രണം ബാധകമായിരിക്കും.
വേനലിലെ കൊടും ചൂടിൽ, തൊഴിലാളികളുടെ ആരോഗ്യ സുരക്ഷ ഉറപ്പാക്കുന്നതിനും, സൂര്യാഘാതം ഏൽക്കുന്നതിനുള്ള സാധ്യതകൾ മുൻനിർത്തിയുമാണ് ഈ നിയന്ത്രണം ഏർപ്പെടുത്തുന്നത്. ഈ നിർദ്ദേശം നടപ്പിലാക്കുന്നതിൽ വീഴ്ച വരുത്തുന്നവർക്കെതിരെ ശക്തമായ നടപടികളുണ്ടാകുമെന്ന് മന്ത്രാലയം വ്യക്തമാക്കിയിട്ടുണ്ട്.
