ഖാലിദ് ബിൻ അൽ വലീദ് റോഡിൽ 2023 ജൂലൈ 23 വരെ ഗതാഗത തടസം അനുഭവപ്പെടാനിടയുണ്ടെന്നും, ഇതിന്റെ ഭാഗമായി യാത്രകൾക്ക് കൂടുതൽ സമയം വേണ്ടിവരുമെന്നും ദുബായ് റോഡ്സ് ആൻഡ് ട്രാൻസ്‌പോർട്ട് അതോറിറ്റി (RTA) അറിയിച്ചു. 2023 ജൂലൈ 8-നാണ് RTA ഇക്കാര്യം അറിയിച്ചത്.
2023 ജൂലൈ 9 മുതൽ 2023 ജൂലൈ 23-ന് പുലർച്ചെ 5 മണിവരെയാണ് ഈ റൂട്ടിലെ യാത്രകൾക്ക് കാലതാമസം നേരിടാൻ സാധ്യതയുണ്ടെന്ന് RTA ചൂണ്ടിക്കാട്ടിയിരിക്കുന്നത്. ഖാലിദ് ബിൻ അൽ വലീദ് റോഡിലെ അൽ ഗുബൈബ, അൽ മിന സ്റ്റേഷൻ എന്നിവയുടെ ഇന്റർസെക്ഷനിലാണ് ഈ ഗതാഗത തടസം അനുഭവപ്പെടാൻ സാധ്യതയുള്ളത്.
ഈ റൂട്ടിൽ നൽകിയിട്ടുള്ള ഗതാഗത അറിയിപ്പുകൾ പിന്തുടരാനും, ഷെയ്ഖ് സബാഹ് അൽ അഹ്‌മദ്‌ അൽ ജാബിർ അൽ സബാഹ് സ്ട്രീറ്റ്, കുവൈറ്റ് സ്ട്രീറ്റ്, ഷെയ്ഖ് ഖലീഫ ബിൻ സായിദ് സ്ട്രീറ്റ് മുതലായ മറ്റു റോഡുകൾ ഉപയോഗിക്കാനും RTA ആഹ്വാനം ചെയ്തിട്ടുണ്ട്.
