റിയാദ് മെട്രോയുടെ പ്രവർത്തനങ്ങളുടെ രണ്ടാം ഘട്ടം 2024 ഡിസംബർ 15-ന് ആരംഭിച്ചു. സൗദി പ്രസ്സ് ഏജൻസിയാണ് ഇക്കാര്യം റിപ്പോർട്ട് ചെയ്തത്.
Riyadh Metro Launches Red and Green Lines Today.https://t.co/So2NtGZzmU#SPAGOV pic.twitter.com/Bh3tCAwrRy
— SPAENG (@Spa_Eng) December 15, 2024
രണ്ടാം ഘട്ടത്തിൽ റിയാദ് മെട്രോയുടെ റെഡ്, ഗ്രീൻ ലൈനുകളിലെ സേവനങ്ങളാണ് പ്രവർത്തനക്ഷമമാക്കിയിരിക്കുന്നത്.
ഡിസംബർ 15 മുതൽ കിംഗ് അബ്ദുല്ല റോഡ് (റെഡ് ലൈൻ), കിംഗ് അബ്ദുൽഅസീസ് റോഡ് (ഗ്രീൻ ലൈൻ) എന്നിവ പ്രവർത്തനക്ഷമമാക്കിയിട്ടുണ്ട്.
റിയാദ് മെട്രോയുടെ റെഡ്, ഗ്രീൻ ലൈനുകളിലെ സ്റ്റേഷനുകളിലേക്ക് ദിനവും രാവിലെ 6 മണിമുതൽ അർദ്ധരാത്രിവരെ പ്രവേശനം അനുവദിക്കുന്നതാണ്. ആകെ 6 ഓട്ടോമേറ്റഡ് മെട്രോ ലൈനുകളാണ് റിയാദ് മെട്രോയുടെ ഭാഗമായുള്ളത്.
ഇതിൽ അൽ ഒലായ – അൽ ബത്ത റൂട്ട് (ബ്ലൂ ലൈൻ), കിംഗ് ഖാലിദ് ഇന്റർനാഷണൽ എയർപോർട്ട് റോഡ് (യെല്ലോ ലൈൻ), അബ്ദുൾറഹ്മാൻ ബിൻ ഓഫ് സ്ട്രീറ്റ്, ഷെയ്ഖ് ഹസ്സൻ ബിൻ ഹുസ്സയിൻ സ്ട്രീറ്റ് ഇന്റർസെക്ഷൻ (പർപ്പിൾ ലൈൻ) എന്നീ മൂന്ന് ലൈനുകൾ 2024 ഡിസംബർ 1 മുതൽ പ്രവർത്തനക്ഷമമാക്കിയിരുന്നു. ഡിസംബർ 15-ന് രണ്ട് ലൈനുകൾ കൂടി പ്രവർത്തനമാരംഭിച്ചതോടെ റിയാദ് മെട്രോയുടെ ഭാഗമായുള്ള ആറ് ലൈനുകളിൽ അഞ്ചും പ്രവർത്തനക്ഷമമാക്കിയിട്ടുണ്ട്.
അൽ മദീന അൽ മുനാവറഹ് റോഡ് (ഓറഞ്ച് ലൈൻ) 2025 ജനുവരി 5-ന് തുറന്ന് കൊടുക്കുമെന്ന് റിയാദ് മെട്രോ അധികൃതർ നേരത്തെ അറിയിച്ചിട്ടുണ്ട്.
25.1 കിലോമീറ്റർ ദൈർഘ്യമുള്ള റെഡ് ലൈനിൽ ആകെ പതിനഞ്ച് സ്റ്റേഷനുകളാണുള്ളത്. 13.3 കിലോമീറ്റർ നീളമുള്ള ഗ്രീൻ ലൈനിൽ 12 സ്റ്റേഷനുകളുണ്ട്.
Cover Image: Saudi Press Agency.
