സന്ദർശകർക്കായി ഗ്ലോബൽ വില്ലേജിലേക്ക് സർവീസ് നടത്തുന്ന നാല് ബസ് റൂട്ടുകളുടെ സേവനം പുനരാരംഭിച്ചതായി ദുബായ് റോഡ്സ് ആൻഡ് ട്രാൻസ്‌പോർട്ട് അതോറിറ്റി (RTA) അറിയിച്ചു. 2024 ഒക്ടോബർ 28-നാണ് ദുബായ് മീഡിയ ഓഫീസ് ഇക്കാര്യം അറിയിച്ചത്.
ഗ്ലോബൽ വില്ലേജിന്റെ ഇരുപത്തൊമ്പതാം സീസൺ 2024 ഒക്ടോബർ 16 മുതൽ ആരംഭിച്ച സാഹചര്യത്തിലാണ് സന്ദർശകർക്കും, വിനോദസഞ്ചാരികൾക്കും യാത്രാ സേവനങ്ങൾ നൽകുന്നതിനായി RTA ഈ ബസ് സർവീസുകൾ പുനരാരംഭിച്ചിരിക്കുന്നത്.
താഴെ പറയുന്ന ബസ് റൂട്ടുകളാണ് ഗ്ലോബൽ വില്ലേജിലേക്ക് സർവീസ് നടത്തുന്നത്:
- റാഷിദിയ സ്റ്റേഷനിൽ നിന്നുള്ള റൂട്ട് 102. ഓരോ 60 മിനിറ്റിലും ഒരു സർവീസ്.
- യൂണിയൻ സ്‌ക്വയർ ബസ് സ്റ്റേഷനിൽ നിന്നുള്ള റൂട്ട് 103. ഓരോ 40 മിനിറ്റിലും ഒരു സർവീസ്.
- അൽ ഗുബൈബ ബസ് സ്റ്റേഷനിൽ നിന്നുള്ള റൂട്ട് 104. ഓരോ 60 മിനിറ്റിലും ഒരു സർവീസ്.
- മാൾ ഓഫ് എമിറേറ്റ്സ് മെട്രോ സ്റ്റേഷനിൽ നിന്നുള്ള റൂട്ട് 106. ഓരോ 60 മിനിറ്റിലും ഒരു സർവീസ്.
ഗ്ലോബൽ വില്ലേജിനകത്ത് ടൂറിസ്റ്റുകൾക്കായി നടത്തുന്ന ഇലക്ട്രിക്ക് അബ്ര (പരമ്പരാഗത ബോട്ട്) സേവനങ്ങളും RTA പുനരാരംഭിച്ചിട്ടുണ്ട്. രണ്ട് ഇലക്ട്രിക്ക് അബ്രകളാണ് ഈ സേവനങ്ങൾക്കായി RTA ഉപയോഗിക്കുന്നത്.
മേഖലയിലെ ഏറ്റവും വലിയ കലാ സാംസ്‌കാരിക വിനോദ വാണിജ്യ മേളയായ ഗ്ലോബൽ വില്ലേജിന്റെ ഇരുപത്തൊമ്പതാം സീസൺ 2024 ഒക്ടോബർ 16-ന് ആരംഭിച്ചിരുന്നു.
Cover Image: Dubai Media Office.
