രാജ്യത്തെ COVID-19 വ്യാപനം തടയുന്നതിനായി 2022 ജനുവരി 8, ശനിയാഴ്ച്ച മുതൽ പ്രതിരോധ നിർദ്ദേശങ്ങളിൽ മാറ്റം വരുത്താനും, കൂടുതൽ നിയന്ത്രണങ്ങൾ നടപ്പിലാക്കാനും ഖത്തർ ക്യാബിനറ്റ് തീരുമാനിച്ചു. 2022 ജനുവരി 5-ന് ഖത്തർ പ്രധാനമന്ത്രി H.E. ഷെയ്ഖ് ഖാലിദ് ബിൻ ഖലീഫ ബിൻ അബ്ദുൽഅസീസ് അൽ താനിയുടെ നേതൃത്വത്തിൽ ചേർന്ന ക്യാബിനറ്റ് യോഗത്തിലാണ് ഇക്കാര്യം തീരുമാനിച്ചത്.
2022 ജനുവരി 8 മുതൽ ഖത്തറിൽ പ്രാബല്യത്തിൽ വരുന്ന COVID-19 പ്രതിരോധ മാനദണ്ഡങ്ങൾ:
പൊതുവായ നിർദേശങ്ങൾ:
- പൊതു ഇടങ്ങളിലേക്ക് (ഇൻഡോർ, ഔട്ട്ഡോർ പൊതുഇടങ്ങൾക്ക് ബാധകം) പ്രവേശിക്കുന്ന മുഴുവൻ പേർക്കും മാസ്കുകളുടെ ഉപയോഗം നിർബന്ധമാണ്. തുറന്ന ഇടങ്ങളിൽ കായികപരിശീലനത്തിൽ ഏർപ്പെട്ടിരിക്കുന്നവർക്ക് മാത്രമാണ് ഇതിൽ ഇളവ് അനുവദിച്ചിട്ടുള്ളത്.
- വീടിനു പുറത്തിറങ്ങുന്ന മുഴുവൻ പൗരന്മാരും, പ്രവാസികളും തങ്ങളുടെ സ്മാർട്ട് ഫോണുകളിൽ നിർബന്ധമായും ‘EHTERAZ’ ആപ്പ് ഇൻസ്റ്റാൾ ചെയ്യേണ്ടതും, ഈ ആപ്പ് പ്രയോഗക്ഷമമാക്കേണ്ടതുമാണ്.
- പള്ളികളിൽ ദിവസ പ്രാർത്ഥനകളും, വെള്ളിയാഴ്ച്ച പ്രാർത്ഥനകളും തുടരും. 12 വയസിന് താഴെയുളള കുട്ടികളെ പള്ളികളിൽ പ്രവേശിപ്പിക്കില്ല. പള്ളികളിലെ ശുചിമുറികൾ പ്രവർത്തിപ്പിക്കുന്നതിന് അനുമതി നൽകിയിട്ടുണ്ട്.
- രണ്ട് ഡോസ് വാക്സിൻ സ്വീകരിച്ചിട്ടുള്ള പരമാവധി 10 പേർക്ക് വീടുകളുടെ ഇൻഡോർ ഇടങ്ങളിൽ ഒത്ത്ചേരാം. ഒരേ കുടുംബത്തിൽ താമസിക്കുന്നവർക്ക് ഈ നിയന്ത്രണം ബാധകമല്ല.
- രണ്ട് ഡോസ് വാക്സിൻ സ്വീകരിച്ചിട്ടുള്ള പരമാവധി 15 പേർക്ക് വീടുകളുടെ ഔട്ട്ഡോറിൽ ഒത്ത്ചേരാം. ഒരേ കുടുംബത്തിൽ താമസിക്കുന്നവർക്ക് ഈ നിയന്ത്രണം ബാധകമല്ല.
- വിവാഹ ചടങ്ങുകൾക്ക് അനുമതി നൽകിയിട്ടുണ്ട്. ഹോട്ടലുകൾ, ഹാളുകൾ തുടങ്ങിയ ഇടങ്ങളിൽ വാക്സിനേഷൻ നടപടികൾ പൂർത്തിയാക്കിയ പരമാവധി 40 പേർക്ക് ഇത്തരം ചടങ്ങിൽ പങ്കെടുക്കാം. തുറന്ന രീതിയിലുള്ള വിവാഹ ഹാളുകളിൽ, ഇത്തരം വേദികളുടെ ശേഷിയുടെ പരമാവധി 50 ശതമാനം അതിഥികളെ (ഇത്തരത്തിൽ പരമാവധി 80 പേർക്ക് വരെ.) പങ്കെടുപ്പിക്കാം.
- ഒരേ വീടുകളിൽ താമസിക്കുന്ന പരമാവധി 15 പേരടങ്ങുന്ന സംഘങ്ങൾ, അല്ലങ്കിൽ ഒരേ കുടുംബങ്ങളിൽ നിന്നുള്ളവർ മാത്രം ഉൾപ്പെടുന്ന സംഘങ്ങൾക്ക് പാർക്ക്, ബീച്ച്, കോർണിഷ് എന്നിവിടങ്ങളിലേക്ക് പ്രവേശിക്കുന്നതിനും, ഒരുമിച്ച് ഇരിക്കുന്നതിനും അനുവദിക്കുന്നതാണ്. കളിയിടങ്ങൾ, പാർക്കുകളിലെ സ്പോർട്സ് ഉപകരണങ്ങൾ എന്നിവ ഉപയോഗിക്കാൻ അനുമതി നൽകും. ഇത്തരം പാർക്കുകളുടെ പരമാവധി ശേഷിയുടെ 75 ശതമാനം സന്ദർശകരെയാണ് ഇത്തരത്തിൽ അനുവദിക്കുന്നത്.
- വാഹനങ്ങളിൽ ഡ്രൈവർ ഉൾപ്പടെ പരമാവധി 4 പേർക്കാണ് ഒരുമിച്ച് യാത്ര ചെയ്യുന്നതിന് അനുമതി നൽകിയിട്ടുള്ളത്. ഒരേ വീടുകളിൽ താമസിക്കുന്ന ഒരേ കുടുംബത്തിൽ നിന്നുള്ളവർക്ക് ഈ നിയന്ത്രണം ബാധകമല്ല.
തൊഴിൽ മേഖലയിലെ നിർദ്ദേശങ്ങൾ:
- പൊതു, സ്വകാര്യ മേഖലകളിലെ തൊഴിലാളികൾക്ക് തൊഴിലിടങ്ങളിൽ നിന്ന് നേരിട്ട് തൊഴിൽ ചെയ്യുന്നത് തുടരാം.
- സർക്കാർ, സ്വകാര്യ മേഖലകളിലെ സ്ഥാപനങ്ങളിൽ ബിസിനസ് മീറ്റിംഗുകളിൽ, വാക്സിൻ സ്വീകരിച്ചിട്ടുള്ള, പരമാവധി 15 പേർക്ക് വരെ പങ്കെടുക്കാമെന്ന തീരുമാനം തുടരും.
- സർക്കാർ മേഖലയിലെയും, സ്വകാര്യ മേഖലയിലെയും COVID-19 വാക്സിൻ സ്വീകരിക്കാത്ത മുഴുവൻ ജീവനക്കാർക്കും ആഴ്ച്ച തോറും റാപിഡ് ആന്റിജൻ ടെസ്റ്റ് നിർബന്ധമാക്കിയിട്ടുള്ളത് തുടരും. COVID-19 വാക്സിനിന്റെ മുഴുവൻ ഡോസുകളും പൂർത്തിയാക്കിയവർ, രോഗമുക്തി നേടിയവർ, ആരോഗ്യ കാരണങ്ങളാൽ വാക്സിനെടുക്കാൻ സാധിക്കാത്തവർ (ഇത് തെളിയിക്കുന്ന അംഗീകൃത മെഡിക്കൽ റിപ്പോർട്ട് നിർബന്ധം) എന്നീ വിഭാഗങ്ങൾക്ക് ഈ പരിശോധന ബാധകമല്ല.
വാണിജ്യ, വിനോദ മേഖലകളിലെ നിയന്ത്രണങ്ങൾ:
- പരമാവധി ശേഷിയുടെ 50 ശതമാനത്തിൽ പ്രവർത്തിക്കുന്നതിന് സിനിമാശാലകൾക്കും, തീയറ്ററുകൾക്കും അനുമതി നൽകിയിട്ടുള്ളത് തുടരും. മുഴുവൻ സന്ദർശകർക്കും വാക്സിനേഷൻ നിർബന്ധമാണ്.
- മ്യൂസിയം, ലൈബ്രറി എന്നിവ പൂർണ്ണശേഷിയിൽ പ്രവർത്തിപ്പിക്കാം. സന്ദർശകർക്ക് വാക്സിനേഷൻ നിർബന്ധമാണ്.
- ആരോഗ്യ മന്ത്രാലയത്തിന്റെ മുൻ‌കൂർ അനുമതിയോടെ പ്രാദേശികവും, അന്താരാഷ്ട്ര തലത്തിലുള്ളതുമായ കായിക മത്സരങ്ങൾ 50 ശതമാനം കാണികളെ പങ്കെടുപ്പിച്ച് കൊണ്ട് സംഘടിപ്പിക്കാൻ അനുമതി. കാണികൾക്ക് വാക്സിനേഷൻ നിർബന്ധം. പ്രാദേശിക തലത്തിലുള്ള ലീഗ് മത്സരങ്ങൾ, ടൂർണമെന്റുകൾ (എല്ലാ പ്രായവിഭാഗങ്ങൾക്കും ബാധകം) എന്നിവ താത്കാലികമായി നിർത്തലാക്കിയിട്ടുണ്ട്.
- ആരോഗ്യ മന്ത്രാലയത്തിന്റെ മുൻ‌കൂർ അനുമതിയോടെ കോൺഫറൻസുകൾ, എക്സിബിഷനുകൾ മുതലായവ നടത്തുന്നതിന് അനുവദിച്ചിട്ടുണ്ട്. തുറന്ന ഇടങ്ങളിൽ പരമാവധി 50 ശതമാനം ശേഷിയിലും, ഇൻഡോർ ഇടങ്ങളിൽ പരമാവധി 30 ശതമാനം ശേഷിയിലുമാണ് ഇവയ്ക്ക് അനുമതി നൽകുന്നത്. ഇത്തരം പരിപാടികളിൽ പങ്കെടുക്കുന്ന മുഴുവൻ പേർക്കും വാക്സിനേഷൻ നിർബന്ധമാണ്.
- ഷോപ്പിംഗ് മാളുകൾ 75 ശതമാനം ശേഷിയിൽ പ്രവർത്തിപ്പിക്കാം. മുഴുവൻ സന്ദർശകർക്കും വാക്സിനേഷൻ നിർബന്ധമാണ്. ഇവയിലെ ഫുഡ് കോർട്ടുകൾ 30 ശതമാനം ശേഷിയിൽ പ്രവർത്തിപ്പിക്കാം.എല്ലാ പ്രായത്തിലുള്ളവർക്കും മാളുകളിൽ പ്രവേശനം അനുവദിക്കും.
- ക്ലീൻ ഖത്തർ’ പദ്ധതിയുടെ കീഴിൽ രെജിസ്റ്റർ ചെയ്തിട്ടുള്ള റെസ്റ്ററന്റുകൾ, കഫെ തുടങ്ങിയ ഭക്ഷണശാലകളിൽ 75 ശതമാനം ശേഷിയിൽ ഔട്ഡോർ ഡൈനിങ്ങ് സേവനങ്ങൾ നൽകുന്നതിന് അനുമതി. വാണിജ്യ മന്ത്രാലയം മുന്നോട്ട് വെച്ചിട്ടുള്ള നിർദ്ദേശങ്ങൾ പാലിച്ച് പ്രവർത്തിക്കുന്ന ഇത്തരം സ്ഥാപനങ്ങൾക്ക് തുറന്ന ഇടങ്ങളിൽ 40 ശതമാനം ശേഷിയിൽ പ്രവർത്തിക്കാൻ അനുമതി.
- ക്ലീൻ ഖത്തർ’ പദ്ധതിയുടെ കീഴിൽ രെജിസ്റ്റർ ചെയ്തിട്ടുള്ള റെസ്റ്ററന്റുകൾ, കഫെ തുടങ്ങിയ ഭക്ഷണശാലകളിൽ 50 ശതമാനം ശേഷിയിൽ ഇൻഡോർ ഡൈനിങ്ങ് സേവനങ്ങൾ നൽകുന്നതിന് അനുമതി. വാണിജ്യ മന്ത്രാലയം മുന്നോട്ട് വെച്ചിട്ടുള്ള നിർദ്ദേശങ്ങൾ പാലിച്ച് പ്രവർത്തിക്കുന്ന ഇത്തരം സ്ഥാപനങ്ങൾക്ക് ഇൻഡോർ ഇടങ്ങളിൽ 30 ശതമാനം ശേഷിയിൽ പ്രവർത്തിക്കാൻ അനുമതി. മുഴുവൻ സന്ദർശകർക്കും വാക്സിനേഷൻ നിർബന്ധമാണ്. 12 വയസിന് താഴെ പ്രായമുള്ള കുട്ടികൾക്ക് അവരുടെ കുടുംബത്തോടൊപ്പം മാത്രമാണ് ഇത്തരം ഇടങ്ങളിലേക്ക് പ്രവേശനം അനുവദിക്കുന്നത്.
- സ്വകാര്യ ആരോഗ്യ പരിചരണ കേന്ദ്രങ്ങൾക്ക് 100 ശതമാനം ശേഷിയിൽ പ്രവർത്തനങ്ങൾ അനുവദിക്കുന്നതാണ്. എല്ലാ ജീവനക്കാർക്കും വാക്സിൻ നിർബന്ധമാണ്.
- പരമ്പരാഗത മാർക്കറ്റുകൾ 75 ശതമാനം ശേഷിയിൽ ആഴ്ച്ചയിൽ എല്ലാ ദിവസവും പ്രവർത്തിപ്പിക്കാം. എല്ലാ പ്രായത്തിലുള്ളവർക്കും പ്രവേശനം അനുവദിക്കും.
- മൊത്തവ്യാപാര മാർക്കറ്റുകൾ 75 ശതമാനം ശേഷിയിൽ പ്രവർത്തിപ്പിക്കാം. മുഴുവൻ സന്ദർശകർക്കും വാക്സിനേഷൻ നിർബന്ധം.
- ബാർബർ ഷോപ്പ്, ബ്യൂട്ടി പാർലർ എന്നിവിടങ്ങളിൽ നിന്ന്, വാക്സിൻ സ്വീകരിച്ചവർക്ക് മാത്രമായി, 50 ശതമാനം ശേഷിയിൽ സേവനങ്ങൾ നൽകാവുന്നതാണ്. മുഴുവൻ ജീവനക്കാരും, ഉപഭോക്താക്കളും വാക്സിൻ സ്വീകരിച്ചിരിക്കണം.
- തീം പാർക്കുകൾ, വിനോദ കേന്ദ്രങ്ങൾ എന്നിവിടങ്ങളിലെ ഔട്ട്ഡോർ മേഖലകൾ 75 ശതമാനം ശേഷിയിൽ പ്രവർത്തിപ്പിക്കാം. ഇൻഡോർ ഇടങ്ങളിൽ, വാക്സിൻ സ്വീകരിച്ചവർക്ക് മാത്രമായി, 50 ശതമാനം ശേഷിയിൽ പ്രവേശനം അനുവദിക്കാം.
- ഹെൽത്ത് ക്ലബ്, ജിം, ഫിറ്റ്നസ് ക്ലബ്, സ്പാ തുടങ്ങിയ സേവനങ്ങൾ നൽകുന്ന ഇടങ്ങളിൽ നിന്ന്, വാക്സിൻ സ്വീകരിച്ചവർക്ക് മാത്രമായി, 50 ശതമാനം ശേഷിയിൽ സേവനങ്ങൾ നൽകാം. മുഴുവൻ സന്ദർശകരും, ജീവനക്കാരും വാക്സിൻ സ്വീകരിച്ചിരിക്കണം.
- ഔട്ട്ഡോർ സിമിങ്ങ് പൂളുകൾ, വാട്ടർ പാർക്ക് എന്നിവ 75 ശതമാനം ശേഷിയിൽ പ്രവർത്തിപ്പിക്കാം. ഇൻഡോർ സിമിങ്ങ് പൂളുകൾ 50 ശതമാനം ശേഷിയിൽ പ്രവർത്തിക്കാം. മുഴുവൻ സന്ദർശകരും വാക്സിനേഷൻ പൂർത്തിയാക്കിയിരിക്കണം.
പൊതുഗതാഗത മേഖലയിലെ നിയന്ത്രണങ്ങൾ:
- ബസുകളിൽ പരമാവധി ശേഷിയുടെ 60 ശതമാനം പേർക്ക് അനുമതി.
- മെട്രോ, മറ്റു പൊതുഗതാഗത സംവിധാനങ്ങൾ എന്നിവ 60 ശതമാനം ശേഷിയിൽ പ്രവർത്തിക്കും.
- ഡ്രൈവിംഗ് സ്‌കൂളുകൾ 50 ശതമാനം പ്രവർത്തനശേഷിയിൽ തുറക്കാൻ അനുമതി. ജീവനക്കാർക്കും, ഡ്രൈവിംഗ് പഠിക്കുന്നവർക്കും വാക്സിനേഷൻ നിർബന്ധമാണ്.
വിദ്യാഭ്യാസ മേഖലയിലെ നിയന്ത്രണങ്ങൾ:
- ട്രെയിനിങ്ങ് കേന്ദ്രങ്ങൾ, സ്വകാര്യ വിദ്യാഭ്യാസ കേന്ദ്രങ്ങൾ എന്നിവ 50 ശതമാനം ശേഷിയിൽ പ്രവർത്തിപ്പിക്കാവുന്നതാണ് (ഇത്തരത്തിൽ ഒരു ഹാളിൽ പരമാവധി 50 പേർ വരെ എന്ന രീതിയിൽ). അധ്യാപകർക്കും, വിദ്യാർത്ഥികൾക്കും വാക്സിനേഷൻ നിർബന്ധമാണ്.
- നഴ്സറികൾക്ക് പരമാവധി 50 ശതമാനം ശേഷിയിൽ പ്രവർത്തിക്കാം. നഴ്സറി ജീവനക്കാർക്ക് വാക്സിനേഷൻ നിർബന്ധമാണ്.
2022 ജനുവരി 8 മുതൽ പ്രാബല്യത്തിൽ വരുന്ന ഈ നിയന്ത്രണങ്ങൾ ഇനി ഒരു അറിയിപ്പുണ്ടാകുന്നത് വരെ തുടരുമെന്നും അധികൃതർ വ്യക്തമാക്കിയിട്ടുണ്ട്.
