വ്യക്തി വിവരങ്ങൾ ചോർത്തുന്നത് ലക്ഷ്യമിട്ടുള്ള വാട്സ്ആപ്പ് കാളുകൾ, സന്ദേശങ്ങൾ എന്നിവയെക്കുറിച്ച് ബഹ്‌റൈൻ ആരോഗ്യ മന്ത്രാലയം മുന്നറിയിപ്പ് നൽകി. പ്രാദേശിക മാധ്യമങ്ങളാണ് ഇക്കാര്യം റിപ്പോർട്ട് ചെയ്തത്.
ബഹ്‌റൈൻ ആരോഗ്യ മന്ത്രാലയത്തിന്റെ ഔദ്യോഗിക ലോഗോ ദുരുപയോഗം ചെയ്യുന്ന വ്യാജ വാട്സ്ആപ്പ് അക്കൗണ്ടുകളിൽ നിന്നാണ് ഈ തട്ടിപ്പ് കാളുകളും, സന്ദേശങ്ങളും വരുന്നതെന്ന് അധികൃതർ ചൂണ്ടിക്കാട്ടിയിട്ടുണ്ട്. ബഹ്‌റൈൻ ആരോഗ്യ മന്ത്രാലയത്തിലെ ഉദ്യോഗസ്ഥരായി ചമഞ്ഞ് കൊണ്ട് ഇത്തരം കാളുകളിലും, സന്ദേശങ്ങളിലും വ്യക്തികളുടെ COVID-19 വാക്സിനേഷൻ ഡോസ് സംബന്ധിച്ച വിവരങ്ങളാണ് തട്ടിപ്പ് സംഘങ്ങൾ ആവശ്യപ്പെടുന്നതെന്ന് അധികൃതർ കൂട്ടിച്ചേർത്തു.
വാക്സിനേഷൻ വിവരങ്ങൾ രേഖപ്പെടുത്തുന്നതിനായി വ്യക്തികളോട് ഒരു വ്യാജ ആപ്പ് ഡൌൺലോഡ് ചെയ്യുന്നതിനാണ് ഇത്തരം തട്ടിപ്പ് സംഘങ്ങൾ ആവശ്യപ്പെടുന്നത്. ഈ ആപ്പ് ഇൻസ്റ്റാൾ ചെയ്യുന്ന വ്യക്തികളുടെ ഫോണിൽ നിന്നുള്ള ബാങ്കിങ്ങ് വിവരങ്ങൾ, അക്കൗണ്ട് സംബന്ധമായ വിവരങ്ങൾ എന്നിവ ഉൾപ്പടെയുള്ള സ്വകാര്യ വിവരങ്ങൾ ഈ തട്ടിപ്പ് സംഘങ്ങൾ ചോർത്തുന്നതായും, അതിനാൽ ഇത്തരം തട്ടിപ്പിന് ഇരയാകാതിരിക്കാൻ ജാഗ്രത പുലർത്തണമെന്നും മന്ത്രാലയം കൂട്ടിച്ചേർത്തു.
Cover Image: Pixabay.
