എമിറേറ്റിൽ ഈദുൽ അദ്ഹ വേളയിൽ പൊതു സുരക്ഷ ഉറപ്പാക്കുന്നതിനായി പൊതുജനങ്ങൾ ശ്രദ്ധിക്കേണ്ട മുന്നൊരുക്കങ്ങൾ സംബന്ധിച്ച് അബുദാബി അധികൃതർ ഒരു പ്രത്യേക അറിയിപ്പ് പുറത്തിറക്കി. 2025 ജൂൺ 5-നാണ് അബുദാബി മീഡിയ ഓഫീസ് ഇക്കാര്യം അറിയിച്ചത്.
.@ADPoliceHQ and @CivilDefenceAD have issued prevention and safety guidelines for the Eid Al Adha holiday, urging community members to adhere to precautionary measures during the celebrations, supporting the continued protection of lives and property in the emirate. pic.twitter.com/6EbFyefhYd
— مكتب أبوظبي الإعلامي (@ADMediaOffice) June 5, 2025
അബുദാബി സിവിൽ ഡിഫൻസ് അതോറിറ്റി, അബുദാബി പോലീസ് ഹെഡ്ക്വാർട്ടേഴ്‌സ് എന്നിവർ സംയുക്തമായാണ് ഈ അറിയിപ്പ് പുറത്തിറക്കിയിരിക്കുന്നത്. ഈദുൽ അദ്ഹ വേളയിലെ ആഘോഷങ്ങൾക്കിടയിൽ പാലിക്കേണ്ടതായ മുൻകരുതൽ നിർദ്ദേശങ്ങളാണിവ.
ഈ അറിയിപ്പ് പ്രകാരം താഴെ പറയുന്ന കാര്യങ്ങളിൽ ജാഗ്രത പുലർത്താൻ പൊതുജനങ്ങളോട് അബുദാബി അധികൃതർ ആവശ്യപ്പെട്ടിട്ടുണ്ട്:
- വാഹനങ്ങൾ ഡ്രൈവ് ചെയ്യുന്ന അവസരങ്ങളിൽ ട്രാഫിക് നിയമങ്ങൾ പാലിക്കേണ്ടതാണ്.
- അമിതവേഗത്തിലുള്ള ഡ്രൈവിംഗ് ശീലങ്ങൾ ഒഴിവാക്കേണ്ടതാണ്.
- അടിയന്തിര സേവനങ്ങൾ നൽകുന്ന വാഹനങ്ങൾക്ക് മാർഗ്ഗതടസ്സം സൃഷ്ടിക്കുന്ന രീതിയിലുള്ള ഡ്രൈവിംഗ് ശീലങ്ങൾ ഒഴിവാക്കേണ്ടതാണ്.
- അശ്രദ്ധമായ ഡ്രൈവിംഗ് രീതികൾ, സാഹസികമായ ഡ്രൈവിംഗ് ശൈലികൾ എന്നിവ ഒഴിവാക്കേണ്ടതാണ്.
- കരിമരുന്നിന്റെ ഉപയോഗം ഒഴിവാക്കേണ്ടതാണ്.
- ചാർജറുകൾ, എക്സ്റ്റൻഷൻ കേബിളുകൾ, മറ്റു ഇലൿട്രോണിക് ഉപകരണങ്ങൾ എന്നിവ ശ്രദ്ധയോടെ ഉപയോഗിക്കേണ്ടതാണ്. ഇവ സുരക്ഷാ മാനദണ്ഡങ്ങൾ പാലിച്ച് നിർമിച്ചവയാണെന്ന് ഉറപ്പ് വരുത്തേണ്ടതാണ്.
- കുട്ടികൾ റോഡുകളിലോ, റോഡരികുകളിലോ കളിക്കുന്നില്ലെന്ന് ഉറപ്പ് വരുത്തേണ്ടതാണ്. അവർ റോഡ് മുറിച്ച് കടക്കുന്ന അവസരങ്ങളിൽ മുതിർന്നവരുടെ മേൽനോട്ടം ഉറപ്പ് വരുത്തുക.
- ബാർബിക്യൂ ഒരുക്കുന്നതിനായി തുറന്നതും, സുരക്ഷിതമായതുമായ ഇടങ്ങൾ തിരഞ്ഞെടുക്കേണ്ടതാണ്. ബാർബിക്യൂ ഒരുക്കിയ ശേഷം കൽക്കരി, വിറക് മുതലായവയിലെ തീ പൂർണ്ണമായും കെടുത്താൻ ശ്രദ്ധിക്കേണ്ടതാണ്.
- അടിയന്തിര സാഹചര്യങ്ങളിൽ പൊതുജനങ്ങൾക്ക് 999 എന്ന നമ്പറിൽ അധികൃതരുമായി ബന്ധപ്പെടാവുന്നതാണ്.
