മിഷൻ ഇമ്പോസ്സിബിൾ സീരിസിലെ ഏറ്റവും പുതിയ ചിത്രത്തിന്റെ പശ്ചിമേഷ്യന്‍ പ്രദേശങ്ങളിലെ പ്രീമിയർ അബുദാബിയിൽ വെച്ച് സംഘടിപ്പിക്കുമെന്ന് അധികൃതർ വ്യക്തമാക്കി. ‘മിഷൻ ഇമ്പോസ്സിബിൾ – ഡെഡ് റെക്കണിങ്ങ് പാർട്ട് വൺ’ എന്ന ചിത്രത്തിന്റെ പ്രീമിയറാണ് 2023 ജൂൺ 26-ന് അബുദാബിയിലെ എമിറേറ്റ്സ് പാലസിൽ വെച്ച് നടത്തുന്നത്.
എമിറേറ്റ്സ് പാലസിൽ സംഘടിപ്പിക്കുന്ന ഈ റെഡ്-കാർപ്പറ്റ് ചടങ്ങിൽ ‘മിഷൻ ഇമ്പോസ്സിബിൾ – ഡെഡ് റെക്കണിങ്ങ് പാർട്ട് വൺ’ ചലച്ചിത്രത്തിലെ ടോം ക്രൂയിസ് ഉൾപ്പടെയുള്ള നടീനടന്മാർ, ഡയറക്ടർ ക്രിറ്റോഫർ മക്ക്വാറീ മുതലായ അണിയറപ്രവർത്തകർ തുടങ്ങിവർ പങ്കെടുക്കും. പാരാമൗണ്ട് പിക്ചേർസ് തയ്യാറാക്കുന്ന ഈ ചലച്ചിത്രത്തിന്റെ പ്രധാന ഭാഗങ്ങൾ അബുദാബിയിൽ വെച്ചാണ് ഷൂട്ട് ചെയ്തിരിക്കുന്നത്.
ലിവ മരുഭൂമി, അബുദാബി മിഡ്ഫീൽഡ് ടെർമിനൽ തുടങ്ങിയ ഇടങ്ങളിൽ ഈ സിനിമ ഷൂട്ട് ചെയ്തിരുന്നു. ഈ സിനിമയ്ക്ക് വേണ്ടി മരുഭൂമിയിൽ ഒരു അറേബ്യൻ ഗ്രാമത്തിന്റെ സെറ്റ് ഒരുക്കിയിരുന്നു. ഇത്തിഹാദ് എയർവെയ്‌സാണ് ഈ സിനിമയുടെ ഔദ്യോഗിക എയർലൈൻ പാർട്ണർ.
ഇത് രണ്ടാം തവണയാണ് മിഷൻ ഇമ്പോസ്സിബിൾ സീരിസിലെ ഒരു സിനിമ അബുദാബിയിൽ വെച്ച് ഷൂട്ട് ചെയ്യുന്നത്. 2018-ൽ പുറത്തിറങ്ങിയ ‘മിഷൻ ഇമ്പോസ്സിബിൾ – ഫാൾഔട്ട്’ സിനിമയിലെ അത്ഭുതകരമായ പാരച്യൂട്ട് രംഗം അബുദാബിയിൽ വെച്ചായിരുന്നു ഷൂട്ട് ചെയ്തത്.
Cover Image: Abu Dhabi Media Office.
