ഭക്ഷണ സാധനങ്ങൾ, മരുന്നുകൾ മുതലായ അവശ്യ വസ്തുക്കൾക്ക് അമിതമായ വില ഈടാക്കുന്ന വ്യാപാര സ്ഥാപനങ്ങൾക്കെതിരെ കർശനമായ നടപടികൾ കൈക്കൊള്ളുമെന്ന് അബുദാബി ഡിപ്പാർട്മെന്റ് ഓഫ് ഇക്കണോമിക് ഡെവലപ്മെന്റ് (DED) അറിയിച്ചു. ഇത്തരം വ്യാപാര സ്ഥാപനങ്ങളെ നിയന്ത്രിക്കുന്നതിനുള്ള നടപടികൾ വ്യക്തമാക്കിക്കൊണ്ടുള്ള ഉത്തരവ് DED പുറത്തിറക്കി.
ഈ ഉത്തരവ് പ്രകാരം അന്യായമായ വില വർദ്ധനവുകൾ നടത്തുന്ന സ്ഥാപനങ്ങൾക്ക് 250,000 AED മുതൽ 2 മില്യൺ ദിർഹം വരെ പിഴ ചുമത്താവുന്നതാണെന്ന് DED അറിയിച്ചു. ഇത് കൂടാതെ ഇത്തരം സ്ഥാപനങ്ങളുടെ പ്രവർത്തനാനുമതി താത്കാലികമായോ സ്ഥിരമായോ നിർത്തലാക്കുന്നതിനും അധികൃതർക്ക് അധികാരമുള്ളതായും DED ഓർമിപ്പിച്ചു.
പൊതുജനങ്ങളുടെ അവകാശങ്ങൾ സംരക്ഷിക്കാനും വിപണിയിലെ മോശം പ്രവണതകൾ ഒഴിവാക്കാനാണ് ഈ തീരുമാനം. ഇതിലൂടെ പൂഴ്ത്തിവെപ്പ്, കുത്തക വ്യാപാരം എന്നിവ തടയാനും DED ലക്ഷ്യമിടുന്നു.
