COVID-19 പ്രതിരോധത്തിന്റെ ഭാഗമായി ദുബായ് ഇക്കണോമി നടപ്പിലാക്കി വരുന്ന പരിശോധനകളിൽ, സുരക്ഷാ നിർദ്ദേശങ്ങളിലെ വീഴ്ച്ചകൾ കണ്ടെത്തിയ എമിറേറ്റിലെ 61 വാണിജ്യ സ്ഥാപനങ്ങൾക്ക് പിഴ ചുമത്തിയതായി അധികൃതർ അറിയിച്ചു. ജൂൺ 9-നാണ് അധികൃതർ ഇക്കാര്യം അറിയിച്ചത്.
രോഗവ്യാപനം തടയുന്നതിനും, സുരക്ഷാ നിർദ്ദേശങ്ങളെ കുറിച്ച് അവബോധം ഉളവാക്കുന്നതിനും ലക്ഷ്യമിട്ടുള്ള ദുബായ് ഇക്കണോമിയുടെ പരിശോധനകൾ എമിറേറ്റിലുടനീളമുള്ള വ്യാപാര കേന്ദ്രങ്ങളിലും, വാണിജ്യ സ്ഥാപനങ്ങളിലും തുടരുകയാണ്. എമിറേറ്റിലെ പൊതു മാർക്കറ്റുകളിലും, വാണിജ്യ കേന്ദ്രങ്ങളിലും ജൂൺ 8-ന് നടത്തിയ പരിശോധനകളിലാണ് ഈ നിയമലംഘനങ്ങൾ അധികൃതർ കണ്ടെത്തിയത്.
പിഴ ചുമത്തിയ സ്ഥാപനങ്ങളിൽ ജീവനക്കാർക്കിടയിൽ മാസ്കുകളുടെ ഉപയോഗത്തിലുള്ള വീഴ്ച്ചകളും, സമൂഹ അകലം ഉറപ്പാക്കുന്നതിലെ വീഴ്ച്ചകളുമാണ് കണ്ടെത്തിയതെന്ന് അധികൃതർ അറിയിച്ചു. ഇതിന് പുറമെ, പ്രവർത്തിക്കാൻ അനുമതി നൽകിയിട്ടുള്ള സമയക്രമം പാലിക്കാത്ത 45 ഭക്ഷണശാലകൾക്കെതിരെയും അധികൃതർ നടപടിയെടുത്തിട്ടുണ്ട്. പിഴ ചുമത്തിയ സ്ഥാപനങ്ങളിൽ ഭക്ഷണശാലകൾ, സൂപ്പർമാർക്കറ്റ്, ഗ്രോസറി, ജിം, സ്പോർട്സ് അക്കാദമി മുതലായവ ഉൾപ്പെടുന്നു. അൽ മുറാർ, അൽ ഖുസൈസ്, അൽ ബദാ, ബിസിനസ് ബേ, റാസ് അൽ ഖോർ, നൈഫ് തുടങ്ങിയ ഇടങ്ങളിലാണ് ഈ പരിശോധനകൾ നടത്തിയത്.
രോഗവ്യാപനം തടയുന്നതിനും, പൊതുസമൂഹത്തിന്റെ സുരക്ഷയ്ക്കായും പ്രതിരോധ നിർദ്ദേശങ്ങൾ കർശനമായി നടപ്പിലാക്കാൻ മുഴുവൻ സ്ഥാപനങ്ങളോടും ദുബായ് ഇക്കണോമി ആവശ്യപ്പെട്ടിട്ടുണ്ട്. വീഴ്ച്ചകൾ കണ്ടെത്തുന്ന സ്ഥാപനങ്ങൾക്കെതിരെ നിയമനടപടികൾ ഉണ്ടാകുമെന്നും അധികൃതർ കൂട്ടിച്ചേർത്തു. ഇത്തരത്തിലുള്ള സുരക്ഷാ വീഴ്ച്ചകളെക്കുറിച്ചുള്ള വിവരങ്ങൾ 600545555 എന്ന നമ്പറിലോ, https://consumerrights.ae/en/Pages/default.aspx എന്ന വെബ്സൈറ്റിലൂടെയോ, ദുബായ് ഇക്കണോമിയുടെ ആപ്പിലൂടെയോ ഉപഭോക്താക്കൾക്ക് പങ്ക് വെക്കാവുന്നതാണ്.
