ദുബായ് ഹാർബറിനെ ഷെയ്ഖ് സായിദ് റോഡുമായി ബന്ധിപ്പിക്കുന്നതിനായി ഒരു പുതിയ പാലം നിർമ്മിക്കുന്നതിന് തീരുമാനിച്ചതായി ദുബായ് റോഡ്സ് ആൻഡ് ട്രാൻസ്‌പോർട് അതോറിറ്റി (RTA) അറിയിച്ചു. 2024 ഫെബ്രുവരി 4-നാണ് ദുബായ് മീഡിയ ഓഫീസ് ഇക്കാര്യം അറിയിച്ചത്.
ഇരുവശത്തേക്കും രണ്ട് വരികൾ വീതമുള്ള ഈ പാലം ദുബായ് ഹാർബർ പ്രദേശത്തേക്കുള്ള പ്രധാന എൻട്രി-എക്സിറ്റ് പോയിന്റായി പ്രവർത്തിക്കുന്നതാണ്. ഇരുവശത്തേക്കും 1500 മീറ്റർ നീളത്തിലാണ് ഈ പാലം നിർമ്മിക്കുന്നത്.
ഈ പാലത്തിന്റെ നിർമ്മാണം പൂർത്തിയാകുന്നതോടെ മേഖലയിലേക്ക് സഞ്ചരിക്കുന്നതിന് നിലവിൽ വേണ്ടി വരുന്ന 12 മിനിറ്റ് എന്ന യാത്രാ സമയം കേവലം 3 മിനിറ്റായി ചുരുങ്ങുന്നതാണ്. ഇരുവശത്തേക്കും മണിക്കൂറിൽ 6000 വാഹനങ്ങളെ വരെ ഉൾക്കൊള്ളാനാകുന്ന രീതിയിലാണ് ഈ പാലം നിർമ്മിക്കുന്നത്.
ഷെയ്ഖ് സായിദ് റോഡിൽ അമേരിക്കൻ യൂണിവേഴ്സിറ്റി ദുബായ്ക്ക് സമീപമുള്ള ഫിഫ്ത് ഇന്റർസെക്ഷനിൽ നിന്ന് ദുബായ് ഹാർബർ പ്രദേശത്തേക്ക് ബന്ധിപ്പിക്കുന്ന രീതിയിലാണ് ഈ പാലം നിർമ്മിക്കുന്നതെന്ന് RTA ചെയർമാൻ മതർ അൽ തയർ വ്യക്തമാക്കി. പദ്ധതി പ്രഖ്യാപിച്ച് കൊണ്ട് സംസാരിക്കുന്നതിനിടയിലാണ് അദ്ദേഹം ഇക്കാര്യം അറിയിച്ചത്.
ഈ പദ്ധതി അൽ നസീം സ്ട്രീറ്റ്, അൽ ഫലഖ് സ്ട്രീറ്റ് എന്നിവ തമ്മിലുള്ള ഇന്റർസെക്ഷനിലൂടെ കടന്ന് പോകുമെന്നും, കിംഗ് സൽമാൻ ബിൻ അബ്ദുൽ അസീസ് അൽ സഊദ് സ്ട്രീറ്റ് ഇന്റർസെക്ഷൻ മുറിച്ച് കടക്കുന്ന രീതിയിലാണ് ഈ പാലം ദുബായ് ഹർബറിലേക്ക് ബന്ധിപ്പിക്കുന്നതെന്നും അദ്ദേഹം കൂട്ടിച്ചേർത്തു.
Cover Image: Screengrab from video shared by Dubai Media Office.
