നാഷണൽ ഡേയുമായി ബന്ധപ്പെട്ടുള്ള അവധിദിനങ്ങളിൽ രാജ്യത്തെ COVID-19 വാക്സിനേഷൻ കേന്ദ്രങ്ങളുടെ പ്രവർത്തന സമയം സംബന്ധിച്ച് കുവൈറ്റ് ആരോഗ്യ മന്ത്രാലയം അറിയിപ്പ് നൽകി. 2022 ഫെബ്രുവരി 27-ന് പുലർച്ചെ കുവൈറ്റ് ന്യൂസ് ഏജൻസിയാണ് ഇക്കാര്യം റിപ്പോർട്ട് ചെയ്തത്.
കുവൈറ്റ് നാഷണൽ ഡേ, ലിബറേഷൻ ഡേ, ഇസ്റാഅ് മിഅ്റാജ് സ്മരണ എന്നിവയുമായി ബന്ധപ്പെട്ട് 2022 ഫെബ്രുവരി 27 മുതൽ മാർച്ച് 3 വരെ കുവൈറ്റിലെ പൊതു മേഖലയിൽ അവധി പ്രഖ്യാപിച്ചിട്ടുണ്ട്. ഈ സാഹചര്യത്തിലാണ് അവധിദിനങ്ങളിൽ വാക്സിൻ ലഭിക്കുന്നത് സംബന്ധിച്ച് ആരോഗ്യ മന്ത്രാലയം അറിയിപ്പ് നൽകിയിരിക്കുന്നത്.
ഈ അറിയിപ്പ് പ്രകാരം മിഷ്‌റഫ് ഫെയർഗ്രൗണ്ടിൽ പ്രവർത്തിക്കുന്ന കുവൈറ്റ് വാക്സിനേഷൻ കേന്ദ്രം രാവിലെ 9 മുതൽ ഉച്ചയ്ക്ക് 2 മണിവരെ പ്രവർത്തിക്കുന്നതാണ്. ഈ കേന്ദ്രത്തിൽ നിന്ന് 40 വയസിന് മുകളിൽ പ്രായമുള്ളവർക്ക് മുൻ‌കൂർ ബുക്കിംഗ് കൂടാതെ വാക്സിൻ ലഭിക്കുന്നതാണ്. അൽ ശീബ്, സൽവ, ഒമരിയ, മസയെൽ, അൽ നഇഎം തുടങ്ങിയ ഇടങ്ങളിലെ പ്രാഥമിക ആരോഗ്യ പരിചരണ കേന്ദ്രങ്ങൾ ദിനവും വൈകീട്ട് 3 മണിമുതൽ രാത്രി 9 വരെ പ്രവർത്തിക്കുന്നതാണ്.
ആരോഗ്യ മന്ത്രാലയം വക്താവ് ഡോ. അബ്ദുല്ല അൽ സനദിനെ ഉദ്ധരിച്ചാണ് കുവൈറ്റ് ന്യൂസ് ഏജൻസി ഇക്കാര്യം റിപ്പോർട്ട് ചെയ്തിരിക്കുന്നത്.
