ഒമാനിൽ പ്ലാസ്റ്റിക് ബാഗുകളുടെ നിരോധനം നടപ്പിലാക്കുന്നതുമായി ബന്ധപ്പെട്ട തീരുമാനത്തിന്റെ അഞ്ചാം ഘട്ടം 2026 ജൂലൈ 1-ന് ആരംഭിക്കുന്നതാണ്.
പ്ലാസ്റ്റിക് മൂലമുണ്ടാകുന്ന മലിനീകരണം കുറയ്ക്കുന്നതിനും, സുസ്ഥിരതയിലൂന്നിയുള്ള ജീവിത ശീലങ്ങൾ പ്രോത്സാഹിപ്പിക്കുന്നതിനും ലക്ഷ്യമിട്ടുള്ള ‘2024/8’ എന്ന ഔദ്യോഗിക തീരുമാനത്തിന്റെ അടിസ്ഥാനത്തിലാണ് ഈ നടപടി. ഈ തീരുമാനത്തിന്റെ നാലാം ഘട്ടം 2026 ജനുവരി 1-ന് നടപ്പിലാക്കിയിരുന്നു.
അഞ്ചാം ഘട്ടത്തിൽ ഈ നിയന്ത്രണങ്ങൾ കൂടുതൽ വാണിജ്യ മേഖലകളിലേക്ക് വ്യാപിപ്പിക്കുന്നതാണ്. നിരോധനത്തിന്റെ അഞ്ചാം ഘട്ടത്തിൽ താഴെ പറയുന്ന വാണിജ്യ മേഖലകളെയാണ് ഉൾപ്പെടുത്തിയിരിക്കുന്നത്:
- ഫർണിച്ചർ സ്റ്റോറുകൾ.
- ബ്ലാങ്കറ്റുകൾ, മറ്റു സമാനമായ സാധനങ്ങൾ എന്നിവ വിൽക്കുന്ന ചില്ലറവിൽപ്പനശാലകൾ.
- കഠാര (ഖഞ്ചർ) വില്പനശാലകൾ.
- സ്വർണ്ണം, വെള്ളി എന്നിവ വിൽക്കുന്ന സ്ഥാപനങ്ങൾ.
- വാഹന പരിചരണ കേന്ദ്രങ്ങൾ.
- വാഹന ഡീലർഷിപ്പുകൾ.
