കൊറോണാ വൈറസ് ബാധ മൂലം രണ്ടാമത്തെ മരണവും റിപ്പോർട്ട് ചെയ്യപ്പെട്ട സൗദി അറേബ്യയിൽ ആകെ കൊറോണാ ബാധിതരുടെ എണ്ണം 900 ആയി. ബുധനാഴ്ച്ച പുതുതായി 133 പേർക്ക് സൗദിയിൽ രോഗബാധ സ്ഥിരീകരിച്ചിരുന്നു. മക്കയിൽ നിന്നാണ് രാജ്യത്തെ രണ്ടാമത്തെ COVID-19 മരണം റിപ്പോർട്ട് ചെയ്തിട്ടുള്ളത്.
രോഗവ്യാപനം തടയുന്നതിനായി സൗദിയിൽ പ്രഖ്യാപിച്ച കർഫ്യു തുടരുകയാണ്. ദിവസവും വൈകീട്ട് 7 മുതൽ രാവിലെ 6 വരെ പ്രഖ്യാപിച്ച കർഫ്യു, കൂടുതൽ കർശനമാക്കുന്നതിന്റെ ഭാഗമായി മക്ക, മദീന, റിയാദ് എന്നിവിടങ്ങളിൽ വൈകീട്ട് 3 മണി മുതൽ 6 വരെയാക്കിയതായി അധികൃതർ അറിയിച്ചിട്ടുണ്ട്. ഈ മൂന്ന് നഗരങ്ങളിലേക്കും നിലവിൽ ആർക്കും പ്രവേശനം അനുവദിക്കുന്നില്ല. 13 മേഖലകളിലെ നിവാസികൾക്ക് മറ്റു മേഖലകളിലേക്ക് പ്രവേശിക്കുന്നതിനും വിലക്കേർപ്പെടുത്തിയിട്ടുണ്ട്.
